Qyrymbek Kósherbaev: Qazaqstan Prezıdenti qandastardyń máselesin muqııat qarap, naqty tapsyrmalar berdi
«Táýelsizdik alǵaly beri elimizge 1 mıllıonan astam qandasymyz kelip, Otanymyzdyń bir-bir ýyǵyna aınalyp, memleketimizdiń órken jaıýyna úlesterin qosýda. Árıne, kósh bolǵasyn júre túzeler kemshilikter bar bolar. Sondyqtan, Qazaqstan Prezıdenti Qasym-Jomart Toqaev atamekendi ańsap kelgen aǵaıyndar máselesin Úkimetke, Prezıdent Ákimshiligine taǵy bir muqııat qarap, qosymsha is-sharalar qabyldaý týraly naqty tapsyrma berdi», - dedi ol.
Memlekettik hatshy búgin de sheteldegi etnıkalyq qazaqtardy qodaý jónindegi 2018-2022 jyldarǵa arnalǵan is-sharalar jospary aıasynda qazaq dıasporasy ókilderi úshin qazaqstandyq JOO-larda bakalavrıattyń bilim berý baǵdarlamalary boıynsha kvota kólemi 4 paıyzǵa kóterilgenin, bilim alýshylardyń 2 747-ge jetkenin atap ótti.
«Budan basqa qandastarymyzdyń baspanamen jáne jumyspen qamtý máselesi 2017-2021 arnalǵan «Eńbek» baǵdarlamasy aıasynda óziniń sheshimin taýyp otyr. Sonymen birge, qazirgi ýaqytta shetelden kelgen aǵaıyndarǵa qujatty resimdeýde kórsetiletin qyzmetterdi ońtaılandyrý, sheteldegi otandastardy memlekettik turǵyda qoldaý týraly zańnamalyq tetikterdi engizý jóninde de mańyzdy sharalar da qolǵa alynady», - dedi Memlekettik hatshy.
Qyrymbek Kósherbaev sondaı-aq, qazaq dıasporasynyń búgingi jaı-kúıi da sóz etti.
«Elimizde qazaq jastarynyń bilim jáne ǵylym salalaryna ynta-yqylasy, olardy ózderi turyp jatqan elderdiń saıası-áleýmettik júıesine tolyqqandy kirigýine baılanysty zertteýler de júrgizilýde. Bul jumystardyń óziniń oń nátıjesin tabary sózsiz. Zamandas aqyn Sabyr Adaıdyń «Ár qazaq – meniń jalǵyzym» degen jyr joldary qanatty sózge aınalyp ketkeni aqıqat. Dúnıeniń tórt buryshyn mekendegen qandastarymyzdyń qadaý-qadaý máselelerin búgingi dóńgelek ústelde sheship tastamaıtynymyz anyq. Alaıda atamekendi ańsap, tarıhı otanǵa úkili úmitpen qarap otyrǵan qandastarymyzǵa búgingi áńgime qanatymen sý sepken qarlyǵashtaı kómek qolyn tıgizip jatsa – mazmundyq jaǵynan sharanyń ózin-ózi aqtaı alǵany dep oılaımyn», - dedi ol.
Memlekettik hatshy sóz sońynda kelesi jyly elimizde «Otandastar» halyqaralyq forýmy ótkiziletinin málim etti.
«Eshqandaı kúmán bolmasyn – Elbasy da, Memleket basshysy da, Úkimet te ultymyzdyń bolashaǵyna qyzmet etýde. Ásirese, halqymyzdyń asyl armany men úkili úmitin iske asyratyn óskeleń urpaqtyń jaǵdaıy – bizdiń eń úlken nazarymyzda. Buıyrsa, sizderdiń usynys-eskertpelerińizdi eskere otyryp, sáýir aıynda Nur-Sultanda «Otandastar» halyqaralyq forýmyn ótkizip, mańyzdy sheshimder qabyldanady dep kútilýde», - dedi ol.
Eske sala ketsek, elordada dúnıe júziniń túkpir-túkpirinen kelgen qandastardyń qatysýymen «Otandastar. Bolashaqqa baǵdar» atty halyqaralyq dóńgelek ústel ótip jatyr.
