Qyrymbek Kósherbaev: Qazaq halqy órkenıettiń jańa talaptaryna saı ómir súre bilýi kerek
«Ǵalamdyq indetke baılanysty aıtar bolsam, jaqynda Memleket basshysy Qasym-Jomart Toqaev maýsym aıynda «Ana tili» gazetine «Qazaq halqynyń taǵdyry tarıh tarazysynda tur» atty maqala jarııalady. Onda Memleket basshysy kóptegen kókeıtesti máselege baılanysty óziniń oı-pikirin aıtty. Іndetke qatysty, ony jeńip shyǵýdyń qandaı joldary bary týraly sóz qozǵaldy. Eldiń birligi men yntymaǵynyń arqasynda «myń ólip, myń tirilgen» qazaq halqy bul qıyndyqtan da aman shyǵatynyna esh kúmán joq. Biraq bir aqıqat bar. Bul ǵalamdyq indet pen áleýmettik-ekonomıkalyq daǵdarystan keıin dúnıe burynǵydaı bolmaıdy. Bizdi úlken órkenıettik ózgerister kútip tur. Sondyqtan biz oǵan daıyn bolýymyz kerek. Sondyqtan biz zııaly qaýymmen birlesip, úlken rýhanı izdenisterdiń aldynda turmyz. Sol suraqtardyń jaýabyn birge aıqyndaýymyz kerek», - dedi «Abaı TV» arnasyna bergen suhbatynda.
Memlekettik hatshynyń aıtýynsha, zamannyń jańa tegeýrinderine laıyqty jaýap berý kerek. Sonymen qatar Qyrymbek Kósherbaev «Rýhanı jańǵyrý» baǵdarlamasynyń júzege asyrylý barysy qaı kezeńde turǵanyn aıtyp ótti.
«Rýhanı jańǵyrý» baǵdarlamasynyń jańa tynysy ashylýy kerek dep esepteımiz. Sebebi zaman ózgerip jatyr. Osy ýaqytqa deıin bul baǵytta kóptegen jumys atqaryldy. Biraq qazir jańa zamannyń kelbetine saı jańa rýhanı jobalar qajet. Sondyqtan osy múmkindikti paıdalana otyra, zııaly qaýymnan ótinerimiz, bılikpen birge zııaly qaýym rýhanı jobalardy júzege asyrýy kerek. Bizge básekege qabiletti tolyqqandy adam qajet. Masyldyqqa oryn joq. Daǵdarysqa jańa múmkindikter men jetistikterdiń bastaýy dep qaraýymyz kerek», - deıdi Qyrymbek Kósherbaev.
Memlekettik hatshy bul rette japon halqynyń 1945 jylǵy tarıhyn eske aldy. Onyń aıtýynsha, 1945 jyly 15 tamyzda Japonııa ımperatory Hırohıto Kıoto qalasynda sóz sóılegen.
«Japonııada ımperatordy kúnniń sáýlesinen jaralǵan adam dep esepteıdi. Imperatordyń aıtqan sózi jurtty biriktirip, uıystyrady. Tártip boıynsha japondyqtar ımperator sóılegende tizerlep turyp, tyńdaıdy eken. Bul joly Hırohıto «Halyqtyń bári túregep tursyn, al ımperatordyń ózi tizerlep turyp eliniń aldynan keshirim suraıdy» dep úndeý jarııalaıdy. Óıtkeni japon armııasy tas-talqan bolyp, AQSh Hırosıma men Nagasakı qalalaryna atom bombasyn tastady. Sol sózinde Hırohıto «jan tózbes qıyndyqqa shydaıyq, emotsııaǵa jol bermeı, nyǵaıyp, birigip, eńbek eteıik» degen sózdi aıtady. Imperator memleketti qutqarýdyń birden-bir joly – adamdy damytý deıdi. Al qazir Japonııa álemdegi tehnologııasy joǵary damyǵan bes memlekettiń qatarynda. Solaı bola tura ózderiniń ulttyq dástúrin qalaı saqtap qalǵanyn bilesiz. Sondyqtan japondyqtardyń kórsetken joly – bizge úlgi», - degen Memlekettik hatshy kezinde Alash qaıratkerleriniń de erligine japon halqynyń jetistigi rýh bergenin eske aldy.
Qyrymbek Kósherbaev tsıfrlyq tehnologııalar, jasandy ıntellekt zamany kezinde ulttyq qundylyqtardan aıyrylyp qalmaı, rýhanı qundylyqtardy baıyta otyryp, órkenıettiń jańa talaptaryna saı ómir súre bilýi kerektigin aıtty.
