Qyrymbek Kósherbaev: Elimizdiń bolashaǵyn baıandy etýge qaltqysyz qyzmet etý - árbir azamattyń ortaq paryzy

NUR-SULTAN. QazAqparat - Baıtaq elimizdiń bolashaǵyn baıandy etýge qaltqysyz qyzmet etý - árbir azamattyń ortaq paryzy. Bul týraly «Qoǵam jáne memleket: «Birgemiz» - 30 jyldyq seriktestik pen damý» atty IX Azamattyq forýmnyń jalpy otyrysynda QR Memlekettik hatshysy Qyrymbek Kósherbaev aıtty, dep habarlaıdy QazAqparat tilshisi.

«Baıtaq elimizdiń bolashaǵyn baıandy etýge qaltqysyz qyzmet etý - árbir azamattyń ortaq paryzy, Otanymyzdyń aldyndaǵy asyl boryshy. Árıne kez kelgen memleket óziniń damý jolynda barsha azamattyń qabileti men qarymyna, áleýeti men adaldyǵyna mán berip, azamattyq qoǵamdy uıymdastyrýǵa baǵyttalǵan baıypty saıasat júrgizgende ǵana oń nátıjege qol jetkizetindigi belgili. Bul oraıda Táýelsizdik jyldarynda elimizde azamattyq qoǵamnyń ornyǵýyna Elbasy Nursultan Nazarbaev ólsheýsiz eńbek sińirse, Memleket basshysy Qasym-Jomart Toqaev osy ıgilikti joldy jalǵastyryp, úkimettik emes uıymdardyń belsendi qyzmet atqarýyna jol ashyp otyr», - dedi Memlekettik hatshy.

Osy rette ol memleket degen uǵymnyń ózi taǵdyry men talaıy, múddesi men múmkindigi toǵysqan azamattardyń toptasýynan quralyp, birtutas el qurýǵa umtylǵan ulttyq qurylym ekendigin atap ótti.

«Sondyqtan biz azamattyń, qoǵamnyń jáne memlekettiń ózara úılesimdi jáne óreli úndestikte ómir súrýine meılinshe múmkindik berýimiz kerek. Biz qoǵam men memlekettiń arasyna ala jip tartyp, azamat pen memleketti arazdastyrýdy maqsat tutatyn bázbir qaǵıdalarǵa múldem qarsymyz», - dedi Qyrymbek Kósherbaev.