Qyrymbek Kósherbaev: Elbasynyń maqalasyn memlekettik baǵdarlama dep ataýǵa bolady

Bul pikirin Qyzylorda oblysynyń ákimi Qyrymbek Kósherbaev Dostyq úıinde «Táýelsiz Qazaqstan etnosaıasatynyń qalyptasýy» taqyrybynda oqyǵan dárisi kezinde bildirdi, dep habarlaıdy QazAqparat.

«Maqalada kóterilgen árbir másele ár qazaqtyń, árbir qazaqstandyqtyń júregine jol tapqan kemel oıdan týǵan kemeńger sheshim ekeni daýsyz.  Bul - qarapaıym maqala emes, halyqty rýhanı baıytý maqsatynda jasalǵan mańyzdy qadam. Halqymyzdyń san ǵasyrlyq tarıhy bar ulttyq qundylyqtaryn búgingi zaman talabymen úndestire otyryp jańǵyrtýdy kózdeıtin memlekettik deńgeıdegi baǵdarlama dep aıtýymyzǵa ábden  bolady»,-dep atap ótti Qyrymbek Kósherbaev.

Aımaq basshysynyń aıtýynsha, táýelsizdiktiń  alǵashqy jyldarynda  derbes  memleket retinde qalyptasqan Qazaqstan óz ekonomıkasyn quryp, damyǵan elderdiń qatarynan kórinýge  barynsha kóńil bóldi.

«Endigi kezekte bizge  rýhanı-mádenı salada jańǵyrý qajet.  Jahandaný zamanynda árbir ulttyń ózin ózi tanýǵa, óz kelbetin naqtylaýǵa umtylýy - zańdylyq. Sondyqtan, Elbasy maqalasynda nazarymyzdy ulttyq kodqa aýdartty: «Birinshiden - ulttyq kod, ulttyq mádenıet saqtalmasa, eshqandaı jańǵyrý bolmaıdy. Ekinshiden - alǵa basý úshin ulttyń damýyna kedergi bolatyn ótkenniń kertartpa tustarynan bas tartý kerek»,- dedi oblys ákimi.