Qyrymbek Kósherbaev: «Bolashaq» elimizdiń adamı kapıtalyn damytýdaǵy serpindi joba
«Qalyptasqan jumys kestesine sáıkes, biz komıssııanyń kezekti otyrysyna jınalyp otyrmyz. QR Tuńǵysh Prezıdenti - Elbasy Nursultan Nazarbaevtyń usynysymen qabyldaǵan «Bolashaq« baǵdarlamasy elimizdiń adamı kapıtalyn damytý salasyndaǵy serpindi joba bolyp sanalady. Sheteldegi reıtıngi joǵary bilim berý mekemelerinde bilim alý kóptegen qazaqstandyqqa ózderiniń kásibı quziretteri men biliktiligin arttyrýǵa aıryqsha múmkindik beretindigi sózsiz. Búgingi otyrystyń kún tártibinde 2 másele qaralady. Birinshi - konkýrstyq irikteýden ótken úmitkerlerge «Bolashaq« halyqaralyq stıpendııasyn taǵaıyndaý týraly, ekinshi - «Bolashaq« halyqaralyq stıpendııasynyń jekelegen ıelerin odan aıyrý týraly», - dedi otyrysty ashqan Memlekettik hatshy.
Kelesi kezekte sóz alǵan QR Bilim jáne ǵylym mınıstri Ashat Aımaǵambetov el Úkimetiniń 2020 jyldyń 6 mamyryndaǵy 271 qaýlysymen bekitilgen «Bolashaq» halyqaralyq stıpendııasyn taǵaıyndaý boıynsha irikteýdiń jańa qaǵıdalaryna sáıkes, stıpendııa taǵaıyndaýǵa qujattardy qabyldaý men konkýrstyq irikteý 27 shildeden bastap 30 qarashaǵa deıin ótetindigi jarııalanǵanyn eske saldy.
«Biz alǵash ret konkýrstyq irikteýdegi keshendi tetileý men táýelsiz saraptamalyq komıssııa múshelerimen suhbattasý prezıdenttik jastar kadrlaryna irikteý úlgisi boıynsha tolyqtaı avtomattandyryldy. Konkýrstyq irikteýdiń alǵashqy leginiń qorytyndysy boıynsha Shetelde kadrlar daıarlaý jónindegi respýblıkalyq komıssııanyń 2020 jylǵy 6 qyrkúıektegi sheshimimen 160 stıpendııa taǵaıyndalǵan bolatyn. Endi qazirgi ýaqytta ekinshi legin daıyndap qoıdyq. Konkýrstyq irikteýdiń ekinshi kezeńi 26 qyrkúıekten bastap 7 qazan aralyǵynda ótti. Táýelsiz saraptamalyq komıssııa múshelerimen suhbattasý qorytyndysy boıynsha 55 úmitker stıpendııa taǵaıyndaýǵa usynylyp, 4 úmitker usynylmady. Buǵan qosa, stıpendııaǵa usynylmaǵan úmitkerlerdiń arasynda suhbattasý nátıjesi ortasha eseppen 3 baldan joǵary alǵan 2 úmitker bar. Alaıda, táýelsiz saraptamalyq komıssııa músheleriniń daýys berýi boıynsha olarǵa stıpendııa usynylmaǵan. Biraq, zańnamaǵa sáıkes, osy eki úmitker boıynsha sońǵy sheshimdi komıssııa anyqtaıdy. Sondyqtan osy máseleni bólek qarastyryp, 2 úmitkerge stıpendııa taǵaıyndaýdy usynamyn», - dedi Ashat Aımaǵambetov.
