Qyrymbek Kósherbaev: Bizde daryndy jastar kóp, olarǵa qoldaý qajet
Qyzylorda. QazAqparat - Búgin Qyzylorda oblysynyń ákimi Qyrymbek Kósherbaev halyq aldyndaǵy esepti kezdesýin ótkizdi. Saltanatty sharaǵa qatysýshylardyń sany óte kóp boldy. Al, zalǵa syımaı qalǵan turǵyndar jergilikti telearna men áleýmettik jeli arqyly tikeleı translıatsııany tamashalaýǵa múmkindik aldy. Kezdesýde ótken jyly aımaqta atqarylǵan jumystardy qorytyndylaǵan aımaq basshysy aldaǵy ýaqyttaǵy maqsattarymen bólisti.
Qyrymbek Kósherbaev osydan týra 5 jyl Qyzylorda oblysyna ákim bolyp taǵaıyndaldy. Osy ýaqyt aralyǵynda óńirdegi birneshe túıtkildi máseleler sheshimin tapty. Halyq aldyna shyǵyp, sóz alǵan aımaq basshysy bir jarym saǵatqa jýyq ýaqyt baıandama jasady.
Jalpy, 2017 jyly Qyzylorda oblysynda kóptegen jumystar atqaryldy. Apatty turǵyn úıler máselesi túbegeıli sheshimin taýyp, tozyǵy jetken baspanadan sharshaǵan 309 otbasy qonystoıyn toılady. Jalpy sońǵy 5 jylda oblysta 2 mln. sharshy metr aýmaqqa turǵyn úı boı kótergen. Salystyrmaly túrde aıtqanda, 2013 jyly 270 myń sharshy metr turǵyn úı salynsa, qazir bul kórsetkish 600 myń sharshy metrden asady. Sonymen qatar, sońǵy jyldary oblys ortalyǵynda 14 jańa shaǵyn aýdan boı kótergen. Al, áleýmettik jaǵdaıy tómen otbasylardy turǵyn úımen qamtamasyz etý maqsatynda «Orda» jobasy qolǵa alyndy.
Kásipkerliktiń kókjıegi keńeıip, jańa jobalar júzege asty. Jalpy, sońǵy 5 jylda oblys aýmaǵynda 200-den astam áleýmettik nysan paıdalanýǵa berildi. Densaýlyq saqtaý salasyna kóńil bólinip, 5 jylda 57 nysan salyndy. Nátıjesinde qaýipti dertke shaldyqqandardyń sany azaıdy. Qazirgi kúni Syrdarııanyń sol jaǵalaýyn ıgerý jumystary qarqyndy júzege asyrylýda. Kózdiń jaýyn alar kórikti qala boı kóterip kele jatyr.
«Qyzylordanyń jastary óte daryndy, olarǵa tek qoldaý kórsetý kerek. Sol sebepti apatty mektepter máselesin sheshý - basty maqsat boldy. Qazirgi kúni bul turǵyda oblys boıynsha problema joq. Ótken jyly mektep túlekteriniń 97 paıyzy joǵary jáne orta arnaýly oqý oryndaryna oqýǵa tústi. Bul biz úshin úlken jetistik. 2013 jylmen salystyrǵanda bilim berý salasynyń bıýdjeti búginde 2 esege ósken. Jastarymyz shetelde oqýǵa múmkindik aldy. Ásirese, Reseıde bilim alyp jatqan túlekterge úlken úmit artamyn. Olar bizdiń bolashaǵymyzdy kemeldi ete alady», - dedi oblys ákimi.
Sondaı-aq, jıyn barysynda Máskeý qalasynda bilim alyp jatqan qyzylordalyq stýdentter tikeleı baılanysqa shyqty. Jas órender armandaryn júzege asyrýǵa múmkindik bergen aımaq basshysyna rızashylyqtaryn bildirdi.
«Kelekshekte bizdiń túlekter Máskeý memlekettik ýnıversıtetinde de bilim alatyn bolady. Úzdik matematıkterdi daıarlaýdy qolǵa alýymyz kerek. Sondaı-aq, Tatarstan eline barǵan saparymyzda osy máseleni alǵa qoıdyq. Syr boıylyq jastar eń úzdik oqý oryndarynda bilim alýǵa laıyq», - dep atap ótti Qyrymbek Eleýuly.
Baıqońyrdy damytý maqsatynda Qazaqstan men Reseıdiń arasynda qalany uzaq merzimdi damytýdyń birlesken baǵdarlamasy jasalǵan. Joba aıasynda qalanyń tirshilik etý ortalyqtarynyń jaı-kúıin jaqsartý jáne turǵyn úı qurylysyn salý jumystary bastaldy. Odan bólek, kelissózderdiń nátıjesinde 2017 jyly Reseı Federatsııasynyń jaldaýynan shaǵyn jáne orta kásipkerlikti damytý úshin 11,6 myń gektar jer qaıtarylyp alynǵan. Qazir Reseı tarapymen jaldaýdan 3,4 myń gektar jerdi alýǵa kelissózder júrgizilýde.
Baıqońyr qalasyn gazdandyrý, 5 kóppáterli turǵyn úı qurylysy, aýyz sýmen jabdyqtaý jáne jalpy sý júıesin jańǵyrtý jumystary bastalyp ketti.
Jıynǵa kelgender oblystyq damý tendentsııasy taqyrybynda ázirlengen arnaıy beınerolıkti de tamashalady. Munan soń oblys ákimi turǵyndardan kelip túsken suraqtarǵa jaýap berdi.
«Qyzylordalyqtardy qoǵamdyq kólik máselesi qatty alańdatady. Naqty aıtqym keledi, bıyl qoǵamdyq kóliktiń quny kóterilmeıdi. Jolaýshylardy tasymaldaý sapasyn jaqsartý úshin qosymsha avtobýstar ákelinedi. Bul sala udaıy meniń baqylaýymda», - dedi aımaq basshysy.
Zalǵa jınalǵandardan bólek, aýdan turǵyndary da oblys ákimine saýaldaryn joldady. Tikeleı baılanysqa shyqqan qyzylordalyqtar kókeıdegi suraqtaryna mardymdy jaýap aldy. Ár óńirdiń azamatymen sóılesken oblys ákimi problemalarymen egjeı-tegjeıli tanysyp, tıisti sala mamandaryna naqty tapsyrmalar júktedi. Call-Ortalyqqa kelip túsken hattardyń eshqaısysy nazardan tys qalmaıtyn bolady.
Aınur Tóleshova
