Qyrymbek Kósherbaev ákim retinde nemen erekshe maqtanatynyn aıtty
«Rýhanı jańǵyrý» aıasynda bilim berý salasyna erekshe mán berip otyrmyz. Eger menen «oblystyń ákimi retinde tósińizdi qaǵyp, maqtanatyn qaı kórsetkishti aıtar edińiz?» dep surasa, onda óndiristi, kásipkerlikti nemese aýyl sharýashylyǵyn emes, eń bastysy mektep bitirgen túlekterdi atap óter edim. Erekshe atap ótetin jáıt - 2017 jyly mektep bitirgen oblys túlekteriniń 97 paıyzy joǵary oqý oryndary men kolledjderge oqýǵa tústi. Bul óte úlken jetistik dep oılaımyn. Osy jastar erteń elimizdiń jańarýyna úles qosyp, jańalyqtarmen tańǵaldyratyn azamattar, elge tirek bolady», - dedi oblys ákimi Ortalyq kommýnıkatsııalar qyzmetinde.
Qyrymbek Kósherbaevtyń aıtýynsha, osy maqsatta talantty da talapty balalarymyzdyń zamanaýı ilim-bilimdi ıgerýi, órkenıet talaptaryna saı bolýy úshin barynsha jaǵdaı jasalýda. Búgingi kúni 452 túlek kelisimge sáıkes, Reseı Federatsııasy Úkimetiniń bıýdjeti esebinen Máskeý men Sankt-Peterbýrgtyń bedeldi de beldi ınjenerlik joǵary oqý oryndarynda oqýda. Osy jazda alǵashqy 78 túlek keledi dep kútilýde.
Al bıyldan bastap M.V. Lomonosov atyndaǵy Máskeý memlekettik ýnıversıteti «Kıberqaýipsizdik» jáne «Protsesterdi matematıkalyq modeldeý» mamandyqtary boıynsha Syr jastaryna 20 grant bóletin bolady. Sonymen qatar, Tatarstannyń Prezıdentimen jyl saıyn 20 adamdy (óńir esebinen) aqparattyq jáne tsıfrlyq tehnologııalar boıynsha Innopolıs ýnıversıtetinde oqytý týraly kelisim bar.
Aıta keteıik, jyl saıyn oblys ákiminiń grantymen az qamtylǵan jáne kópbalaly otbasylardan shyqqan 100-ge jýyq daryndy aýyl balalary aımaqqa qajetti mamandyqtar boıynsha elimizdiń jetekshi joǵary oqý oryndaryna jiberilýde. Búginde osyndaı granttarǵa 700-ge jýyq adam ıe boldy. Bıyl osy baǵdarlama boıynsha 159 daryndy balany oqytýdy, onyń 70%-yn bolashaǵy bar ІT- mamandyqtaryna baǵyttaý josparlap otyr.
Munymen qosa, «Serpin» baǵdarlamasy boıynsha tórt myńnan asa jas bilim alýda.
