Qyrkúıektiń 20-30 aralyǵynda «Astana Ballet» horeografııalyq ujymy álemdik týrnege shyǵady
ASTANA. QazAqparat - Qyrkúıektiń 20-30 aralyǵynda «Astana Ballet» horeografııalyq ujymy álemdik týrnege shyǵady. Bul týraly búgin ótken sońǵy daıyndyq repetıtsııasy barysynda bas baletmeıster Aıgúl Tatı aıtty.
Onyń málimetinshe, týrne sheńberinde bolatyn gastroldik sapar álem moıyndaǵan belgili mádenıet ortalyqtary - Parıj, Vena, Máskeý qalalarynda ótedi.
«Bul sapar biz úshin úlken mártebe. 20 qyrkúıekte bizdiń ujym Parıjdiń Le Palais des Congres de Paris teatrynda óner kórsetedi, sondaı-aq Qazaqstannyń Frantsııadaǵy mádenıet kúnderine qatysamyz. Sodan keıin 24 qyrkúıekte Venadaǵy Halle kontsert zalynda, al 30 qyrkúıekte Máskeýdiń K. Stanıslavskıı jáne V. Nemırovıch-Danchenko atyndaǵy mýzykalyq akademııalyq teatrynda óner kórsetemiz», - dep atap ótti maman.
Onyń aıtýynsha, Parıj ben Vena kórermenderine 2 bólimnen turatyn baǵdarlama kórsetiledi.
«Birinshi bólimge talantty qazaqstandyq jáne sheteldik baletmeısterdiń úzdik jumystaryn kórsetetin «Shyǵys rapsodııasy» kontserttik baǵdarlamasynan nómirleri qamtylǵan. Horeografııalyq kompozıtsııalar Q. Shildebaev, I. Stravınskıı, K. Djenkınson, E. Qusaıynovtardyń jáne «Turan» etno-forlklorlyq tobynyń mýzykalarymen órilgen. Poetıkalyq týyndylardyń avtory belgili qazaqstandyq aqyn Baqyt Qaıyrbekov», - dep atap ótti A. Tatı.
Al ekinshi bólimde kórermender «Astana Ballet» repertýaryndaǵy qazirgi zaman stılindegi alǵashqy iri qoıylym bolyp sanalatyn bir aktili «Álem» baletin tamashalaı alady.
Aıta keteıik, ujym Máskeýde tanymal reseılik horeograf Nıkıta Dmıtrıevskıı qoıǵan «Álem» baletin usynady. Balet zamanaýı álemdik aǵymdar men qazaq bı óneri dástúrli jelisiniń názik sıntezinde qurylǵan. Spektakldiń vızýaldyq tujyrymdamasyn Qazaqstannyń baı mádenıetiniń erekshelikterin eskere otyryp Leonıd Basın daıyndady. Mýzykasy Armand Amar men Bolat Gafarovtiki, lıbrettosyn B. Qaıyrbekov jazǵan.
