Qyrkúıektiń 1-ine deıin elordada 7 balabaqsha paıdalanýǵa beriledi, onyń 5-eýi jańadan salynǵan

dep habarlady Astana qalasy ákimdiginiń baspasóz qyzmetinen.

Búgin qala ákimi Imanǵalı Tasmaǵambetov aǵymdaǵy jyly ashylýǵa daıyn bolatyn 7 balabaqshany aralady.

Baspasóz qyzmetiniń aqparatyna sáıkes, qala basshysy aralaǵan nysandardyń 2-eýi buryndary basqa mekemelerge berilip, keıinnen memleketke qaıtarylǵan. Buǵan deıin áskerı komıssarıat qonystanǵan Zataevıch kóshesindegi 16/1 úı endi - 240 oryndyq, al buryn áskerı bólim ornalasqan Máskeý kóshesindegi 38-shi ǵımarat 140 oryndyq balabaqshaǵa aınalady. Bul nysandardy qaıta qalpyna keltirý jumystaryna bıýdjetten 650 mıllıon teńgeden astam qarjy bólindi.

«Sonymen qatar oqý jylynyń bastalýyna deıin 5 jańadan salynǵan balabaqsha taǵy da 1240 mektep jasyna deıingi balany qabyldaıdy», delingen baspasóz habarlamasynda.

Aǵymdaǵy jyldyń basynda elordada 39 memlekettik balabaqsha jumys istegen bolatyn, qazirgi ýaqytta olardyń sany 48-ge jetip otyr. Sondaı-aq 5 jeke balabaqsha ashylyp, mekeme qatary 27-ge jetti.