Qyrkúıekten bastap muǵalimder jalaqysynyń 50 paıyzy kóleminde ústemeaqy ala alady
NUR-SULTAN. QazAqparat - Pedagogtar ústemeaqy alýy úshin jaz aılarynyń ishinde attestattaý rásimin bitirýimiz kerek. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.
«Pedagog mártebesi týraly» zań aıasynda bıylǵy qyrkúıek aıynan bastap áriptesterimizge ústemeaqy alý múmkindigi týyp otyr. Ol úshin jaz aıynda testileýdi, jalpy attestattaý rásimin ótkizip alýymyz kerek. Boljam boıynsha 100 myńdaǵan áriptesimiz osy testileýge qatysady dep otyrmyz. Árıne, bireýi ótedi, bireýi óte almaıdy. Qalaı desek te, biz ondaı múmkindikti berýimiz kerek. Qyrkúıekten bastap attestattaýdan ótken áriptesterimiz ústemeaqy alýy tıis», - dedi Ashat Aımaǵambetov mınıstrliktiń Facebook paraqshasynda onlaın rejımde ótken apparat jınalysynda.
Sonymen qatar, mınıstr buǵan deıin balabaqsha, kolledj pedagogteri, dırektorlar men olardyń orynbasarlary attestattaýdan ótpegenin jáne ústemaqy almaǵanyn atap ótti.
«Bul másele kópten beri kóterilip keldi. Mysaly, kolledj pedagogtary attestattaýdan ótedi. Biraq, alǵan sanatyna tıisti ústemaqy berilmeıtin. Mektep muǵalimderi ústemeaqy alady, al kolledj muǵalimderi almaıtyn. Balabaqsha boıynsha da osy máseleni áriptesterimiz qansha jyldan beri kóterip keldi. Dırektorlar men olardyń orynbasarlary týraly tipti aıtýdyń da keregi joq. Olar attestattaýdan ótpeıtin jáne ótse de ústemeaqy almaıtyn. Endi dırektor men onyń orynbasarlary attestattaýdan ótip, nátıjesinde 30-dan 100 paıyzǵa deıin jalaqysyna qosymsha ústemeaqy alý múmkindigine ıe bolady. Balabaqsha, mektep, kolledj pedagogtaryna 30-dan 50 paıyzǵa deıin jalaqysyna qosymsha ústemeaqy alýǵa múmkindik týyp otyr. Bul qańtar aıynan bastap qosylǵan 25 paıyz jalaqyǵa qosymsha tólenedi», - dedi Ashat Aımaǵambetov.
