Qyrkúıekten bastap balyq ónimderi GMO-ǵa qatysty aıryqsha tekseriledi
Bul týraly búgin elordadaǵy «Etalon ortalyǵynda» osy máselege arnalǵan jıynda aıtyldy, dep habarlaıdy QazAqparat.
QR IDM Tehnıkalyq retteý jáne metrologııa komıtetiniń tóraǵasy Ǵalymjan Duǵalovtyń sózine qaraǵanda, bul talaptar EAEO-nyń barlyq aýmaǵynda kúshine enedi. Atalǵan tehnıkalyq reglamenttiń talaptaryna sáıkes emes ónim naryqqa shyǵarylmaıdy.
«Reglamentti daıarlaýdyń basty maqsaty - adam ómiri men densaýlyǵyn, janýarlar men ósimdikterdi qorǵaýǵa, tutynýshylardyń aldanýyna ákep soǵatyn áreketterdi boldyrmaýǵa baǵyttalǵan. Bul tehnıkalyq reglament tutynýǵa baǵyttalǵan balyq ónimderine taralady»,-dedi Ǵ. Duǵalov.
Óz kezeginde QR AShM Veterınarlyq baqylaý jáne qadaǵalaý komıteti Tamaq ónimderi jáne orny aýystyrylatyn nysandar qaýipsizdigi basqarmasynyń basshysy Aleksandr Razzarenov engizilgen jańashyldyqtarǵa toqtaldy. Osy oraıda ol negizgi ónimniń qaýipsizdik talaptaryna tikeleı qatysty jeke bólim bar ekenin sóz etti.
«Taǵamdyq balyq ónimderde gormonaldy preparattar, natýraldy jáne sıntetıkalyq zattar, sondaı-aq GMO bolmaýy tıis»,-dep atap ótti Razzarenov.
Atalǵan qujat EAEO-ǵa múshe barlyq elderdiń mamandarynyń qatysýymen ázirlendi.
