Qyrkúıekten bastap 2, 5 jáne 7 synyp oqýshylary jańa oqýlyqpen bilim alady
ASTANA. QazAqparat - Aǵymdaǵy jyldyń qyrkúıek aıynan bastap 2, 5 jáne 7 synyp oqýshylary jańa oqýlyqpen bilim alady. Bul týraly búgin QR Ortalyq kommýnıkatsııalar qyzmetindegi brıfıngte elimizdiń Bilim jáne ǵylym vıtse-mınıstri Elmıra Sýhanberdıeva málim etti, dep habarlaıdy QazAqparat.
«Respýblıkalyq komıssııa jumysynyń qorytyndysyn jarııa etýge ruqsat etińizder. QR Bilim jáne ǵylym mınıstrligi tarıhynda komıssııa múshesi esh ýaqytta 13 adamnan asqan emes jáne bul jumystardyń barlyǵy jabyq rejimde júrgizilip keldi. Biz alǵash ret respýblıkalyq komısııa músheleriniń sanyn 40 adamǵa deıin kóbeıttik. Elimizdiń barlyq óńirlerinen muǵalimder, sonymen birge tájirıbeli ǵalymdar men depýtattar shaqyryldy. Olardyń qatarynda Birǵanym Áıtimova, Bekbolat Tileýhan, Jambyl Ahmetbekov bar. Bul adamdar respýblıkalyq komıssııa jumysyna qatysty. Konkýrsqa otandyq jáne sheteldik 12 baspa qatysty», - dedi ol.
Onyń atap ótýinshe, komıssııa jumysy tolyqtaı kameraǵa túsirilgen.
«Eger pándik komıssııalardyń barlyq múshelerin alatyn bolsaq, onda olardyń sany 140 adamnan asady. Mundaı jaıt ta birinshi ret bolyp otyr. Menińshe, jumys barynsha ashyq boldy. Osy rette 2, 5 jáne 7 synyptarǵa arnalǵan oqýlyqtardy irikteý jumystarynyń qorytyndysyn jarııa etpekpiz», - dedi vıtse-mınıstr.
Onyń deregine sáıkes, komıssııalardyń qaraýyna myńnan astam oqýlyq usynylǵan. Іrikteý barysynda 240-y qaldyrylyp, odan keıin onyń 197-si respýblıkalyq komıssııa qaraýyna usynylǵan. Komıssııa jumysynan keıin 130 oqýlyqty paıdalanýǵa keńes berilgen.
«Olar oqýshynyń jas erekshelikterin eskere otyryp memlekettik standarttar men baǵdarlamalarǵa tolyq saı ázirlengen oqýlyqtar. Biz 1 jyl boıy 2, 5 jáne 7 synyp oqýlyqtaryna saraptama júrgizdik», - dedi Respýblıkalyq ǵylymı-tájirıbelik ortalyq dırektory Beıbitgúl Kárimova.
Onyń sózine qaraǵanda, jańa oqýlyqtar 2015 jyldyń jańa standarttary negizinde ázirlengen jáne mazmuny jaǵynan eski oqýlyqtar birshama aıyrmashylyǵy bar.
