Qyrkúıekte Ulttyq qordyń aktıvteri 1,9 mlrd dollarǵa azaıdy
«Ulttyq qordyń aktıvteri bir aıda 1,9 mlrd AQSh dollarǵa tómendep, qyrkúıektiń sońynda jalpy mólsheri 55 mlrd AQSh dollary boldy.
Qyrkúıekte 392 mlrd teńgege nysanaly jáne kepildendirilgen transfertter bólýdi qamtamasyz etý úshin 913 mln AQSh dollary satyldy.
Qyrkúıekte Ulttyq qorǵa túsken túsimder – 135 mlrd teńge. Onyń ishinde shetel valıýtasynda 259 mln dollar nemese 110 mlrd teńge boldy», - degen Erbolat Dosaev, Ulttyq qordyń ınvestıtsııalyq kirisi de azaıǵanyn atady.
«Qyrkúıekte Ulttyq qordyń ınvestıtsııalyq kirisi teris qalyptasyp, aktıvterdiń barlyq synyptary boıynsha túzetýge baılanysty 1,2 mlrd dollarǵa nemese 2,11% kemidi.
Aktıvterdiń barlyq synyptary boıynsha baǵalardyń bir mezgilde tómendeýi qysqa merzimdi sıpatqa ıe. 11 qazandaǵy jaǵdaı boıynsha Ulttyq qordyń ınvestıtsııalyq kirisi ishinara qalpyna keldi jáne aıdyń basynan bastap 250 mln AQSh dollaryn qurady. Uzaq merzimdi perspektıvada Ulttyq qordyń strategııalyq allokatsııasy táýekelderdi teńgeredi», - dedi ol Úkimet otyrysynda.
