Qyrkúıekte UQShU-ǵa múshe elderdiń aýmaǵynda esirtkige qarsy operatsııa júrgiziledi
«Almaty qalasynda Ujymdyq qaýipsizdik týraly shart uıymynyń qamqorlyǵymen «Kanal-Perehvat» esirtkige qarsy operatsııasyn ótkizý jónindegi uıymdastyrý keńesi aıaqtaldy. «Kanal-Perehvat» operatsııasy 2023 jylǵy qyrkúıekte UQShU-ǵa múshe memleketterdiń aýmaǵynda esirtkiniń zańsyz aınalymyna qarsy is-qımyl jónindegi quzyretti organdardyń qatysýymen júrgiziledi. Qatysýshy elderdiń quqyq qorǵaý organdarynyń ózara árekettesýi men is-qımylyn úılestirýdi Almaty qalasyndaǵy OAÓAOO – Ortalyq Azııa óńirlik esirtki quraldarynyń, psıhotroptyq zattar men olardyń prekýrsorlarynyń zańsyz aınalymyna qarsy kúres jónindegi aqparattyq úılestirý ortalyǵynyń alańynda ornalasqan Halyqaralyq úılestirý shtaby júzege asyrady», - dedi Shuǵyla Turlybek aptalyq brıfıng barysynda.
Onyń atap ótýinshe, baqylaýshylar retinde Úndistan, Iran, Qytaı, Mońǵolııa, Sırııa, Túrikmenstan, Ózbekstan quqyq qorǵaý organdarynyń ókilderi, sondaı-aq birqatar halyqaralyq uıymdar – Qylmystyq kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi eýrazııalyq top, BUU-nyń Esirtki jáne qylmys jónindegi óńirlik basqarmasy, ShYU-nyń terrorızmge qarsy óńirlik qurylymy, TMD keden qyzmetteriniń quqyq qorǵaý bólinisteri basshylarynyń komıteti qatysýdy josparlap otyr.
«Operatsııanyń negizgi mindeti – jańa psıhoaktıvti zattar aınalymynyń jolyn kesý, UQShU-ǵa múshe memleketterdiń aýmaǵynda Aýǵanstan men Irannan aýǵan apıynynyń kontrabandalyq arnalaryn joıý, transulttyq esirtki toptarynyń qyzmetiniń jolyn kesý, zańsyz aınalymnan qarý-jaraq, oq-dáriler men jarylǵysh zattardy alý. Kezdesýde sondaı-aq 2023 jyly UQShU-ǵa múshe memleketterdiń aýmaǵyndaǵy esirtki ahýalynyń ózgerýiniń sońǵy úrdisteri, onyń osy jyldyń ekinshi jartyjyldyǵyndaǵy damý boljamdary talqylandy», - dedi ІІM ókili.