Qyrkúıekte Medıtsınalyq saqtandyrý qoryna 8 mlrd teńge aýdaryldy
ASTANA. QazAqparat - Qyrkúıek aıynda Medıtsınalyq saqtandyrý qoryna 8 mlrd teńge jarna aýdaryldy, dep habarlaıdy QazAqparat qordyń baspasóz qyzmetine silteme jasap.
«2017 jyldyń 1 shildesinen 2018 jyldyń 30 qyrkúıegine deıingi aralyqta jeke kásipkerler men jumys berýshiler tólegen jarnanyń jalpy somasy 105 mlrd teńgege jetti», - dep habarlady baspasóz qyzmeti.
Onyń 96,4 mlrd teńgesi (91,8%) jumys berýshilerdiń aýdarymdary bolsa, qalǵan 8,6 mlrd teńge (8,2%) - jeke kásipkerler men azamattyq-quqyqtyq kelisimshart negizinde eńbek etetin tulǵalarǵa tıesili.
Aımaqtyq turǵydan alǵanda, jarna tóleý jaǵynan Almaty, Astana qalalary men Qaraǵandy oblysy kósh bastap tur.
Qorǵa jınalǵan qarjy Ulttyq bankte saqtalady. Elimizdiń bas bankimen qarjyny senimgerlik basqarý týraly kelisim bekitilgen. Qarjy bolashaqta MÁMS paketi sheńberindegi qyzmetter aqysyn tóleýge jumsalady.
