Qyrkúıekte «Eır Astana» jolaýshylaryna jyldamdyǵy joǵary ınternet usynady
ASTANA. QazAqparat - Otandyq «Eır Astana» áýe kompanııasynyń bortynda qyrkúıekten bastap keń jolaqty ǵalamtorǵa qol jetkizýge bolady. Bul týraly kompanııa Feısbýktegi paraqshasynda habarlady.
«Jaqyn arada «Eır Astana» ushaqtarynyń bortynda jeke kompıýterler, planshetter jáne smartfondar arqyly ǵalamtorǵa qol jetkizýge bolady. Biz avıatsııalyq kóliktegi provaıder Rockwell Collins kompanııasymen kelisimshartqa qol qoıdyq. Onyń kómegimen 2016 jyldyń qyrkúıeginen bastap «Boıng-767» ushaqtarynda jyldamdyǵy joǵary Inmarsat Global Xpress (GX) júıesi ornatylady», - dep jazady otandyq avıatasymaldaýshy.
Osylaısha áýe kompanııa ınternetke jyldam jáne senimdi túrde qol jetkizýge múmkindik beretin keń jolaqty GX júıesin engizgen álemdegi alǵashqy kompanııalardyń biri bolmaq.
