Qyrkúıekte Astanada halyqaralyq jolaýshylar forýmy ótkiziledi
Bul sheshimdi Máskeýdegi Dostastyqqa qatysýshy elderdiń Temirjol kóligi keńesiniń 66-shy otyrysy qabyldady. Forýmǵa Ázerbaıjan, Armenııa, Belarýs, Qyrǵyzstan, Moldova, Reseı, Tájikstan, Ózbekstan, Ýkraına, Grýzııa, Latvııa, Lıtva, Estonııa temirjol ákimshilikteri shaqyryldy. Jolaýshylar forýmy Astanada EKSPO-2017 halyqaralyq kórmesi aıasynda ótkiziledi.
«RTJ» AAQ birinshi vıtse-prezıdenti Anatolıı Krasnoşek EKSPO-2017 halyqaralyq kórmesiniń Qazaqstan úshin ǵana emes, Dostastyq elderi úshin de mańyzynyń zor ekendigin atap ótti.
«Biz bul sharaǵa erekshe kóńil bólip otyrmyz. Kórme taqyryby aıryqsha mańyzdy - «jasyl tehnologııa» barlyq jerde óndiriske engizilýde. Temirjol ınfraqurylymynda ekologııalyq qaýipsizdikti saqtaý men jaqsartý óte mańyzdy»,-deıdi A. Krasnoşek.
«Grýzııa temir joly» AQ Bas dırektory Mamýka Bahtadzeniń aıtýynsha, «qoǵam onyń ishinde ásirese, bıznes qaýymdastyǵy temirjol salasynyń «jasyl ekonomıkany» ustanatyndyǵyn bilýi tıis. Máselen, avtokólik salasynda aýaǵa las zattardy shyǵarý 73 paıyzdy qurasa, temirjolda nebári 2,5 paıyz ǵana. EKSPO halyqaralyq kórmesi sekildi sharany óndiriske ekologııalyq qaýipsiz tehnologııany engizýdiń mańyzdylyǵyn kórsetedi».
«EKSPO-2017 halyqaralyq kórmesi tarıhı oqıǵa. Álemdegi mańyzdy sharalardyń qatarynan sanalady. Onyń Qazaqstanda ótkiziletin etip tańdalýy - úlken abyroı. Úlken abyroı ǵana emes, asa jaýapkershiligi mol shara. Sondyqtan barsha qazaqstandyqtarmen qatar biz temirjolshylar da mindetti túrde memlekettik júıeniń qadamyn quptap, qoldaýy tıis. Osyǵan oraı temirjolshylar jolaýshylar forýmyn ótkizýdi josparlap otyr»,-deıdi M. Bahtadze.
Iran temirjolynyń vıtse-prezıdenti Hýseıin Ashýrı halyqaralyq kórmeniń ótkizilýi temirjolshylardyń, kompanııalardyń, elderdiń yntymaqtastyǵynyń kepili ekendigin aıtady. Iran taraby EKSPO-2017 halyqaralyq kórmesine qatysýǵa múddeli bolyp otyr.
«Temirjol kóligi qorshaǵan ortany lastaý, janar-jaǵarmaı otynyn jaǵý kórsetkishi jóninen de tómen. Sońǵy jyldary Iran úkimeti bul salany jasyl ekonomıkaǵa kóshirý maqsatynda biraz is tyndyrdy. Parlament temirjol kóligi salasyn jasyl tehnologııaǵa kóshirý úshin memlekettik bıýdjetten jylyna bir paıyz tólep turady», - deıdi H. Ashýrı.
Dostastyqqa qatysýshy elderdiń Temirjol kóligi keńesi Dırektsııasynyń tóraǵasy Petr Kýcherenkonyń paıymdaýynsha, Astanadaǵy EKSPO-2017 halyqaralyq kórmesine osy saladaǵy eń ozyq tehnologııalar usynylady.
«Qazaqstan halyqaralyq kórmege tyńǵylyqty daıyndalýda. Biz osy kórmeden kólik salasyna qatysty ári basqa da salalar boıynsha tájirıbe almasatyn bolamyz. Kórmemen tanysyp qana qoımaı, halyqaralyq temirjol kóligimen jolaýshylardy tasymaldaýdyń ózekti jaılary boıynsha da aqparat almasatyn bolamyz», - deıdi P. Kýcherenko.
Atap óterligi, Dostastyqqa qatysýshy elderdiń Temirjol kóligi keńesiniń 2015 jylǵy qarashada Tashkentte qorshaǵan ortany qorǵaý jónindegi Kelisimi jasaldy. Soǵan oraı, temirjol kóligi salasyndaǵy ekologııalyq qaýipsizdik jónindegi halyqaralyq ortalyq quryldy.
