Qyrkúıekke deıin Kalachı aýylynan taǵy 18 otbasy kóshiriledi - Aqmola oblysy (FOTO)
KÓKShETAÝ. QazAqparat - Aldaǵy qyrkúıek aıyna deıin Aqmola oblysynyń Esil aýdanyndaǵy «uıqyly» Kalachı aýylynan taǵy 18 otbasyn kóshirý josparlanyp otyr. Bul týraly aımaq basshysy Sergeı Kýlagınniń Jaqsy jáne Esil aýdandaryna jumys saparynda aıtyldy.
Aımaq basshysy aldymen Jaqsy aýdanynda «Agrofırma TNK» JShS egistik alqaptaryn aralap kórip, eginniń jaıymen tanysty. Bul týraly atalǵan seriktestiktiń bas dırektorynyń orynbasary Ershat Bekov aıtyp berdi. Onyń aıtýyna qaraǵanda birneshe seriktestiktiń basyn biriktirip otyrǵan óńirdegi irgeli sharýashylyqtyń búgingi tańda egini bitik shyǵyp, aldaǵy qońyr kúzde mol ónim jınaýǵa úmit bar. Seriktestik osy kúni qysqa shóp daıyndaý jumystaryn qyzý qolǵa alǵan. Oǵan qosa, egindi ósimdik zııankesterinen qorǵaý sharalaryn keshendi túrde júrgizýde. Qazirgi kezde 200 myń gektar egistik alqaptyń 85 myń gektaryna hımııalyq óńdeý jumystary júrgizilgen.
Aımaq basshysy osynda jergilikti aýyl sharýashylyǵy qurylymdarynyń basshylarymen kezdesip, kúzgi egin oraǵyna daıyndyqtyń qam-qareketin osy bastan qolǵa alýdy tapsyrdy.
Al, Esil aýdanynda bolǵan aımaq basshysy aýdan ortalyǵynda kúrdeli jóndeý jumystary júrgizilip jatqan 40 páterli turǵyn úı jáne jańadan salynyp jatqan aýdandyq ortalyq bý qazandyǵynyń qurylysymen tanysty. Atalǵan turǵyn úıdi qyrkúıek aıynda tapsyrý kózdelgen. Qurylys jumystaryn «Taır» JShS júrgizýde. Bul úıge negizinen bıýdjettik sala qyzmetkerleri, jetim balalar jáne Kalachı aýlynyń turǵyndaryn qonystandyrý kózdelgen.
Osy jerde aımaq basshysy aldaǵy qyrkúıek aıyna deıin «uıqy» aýrýynan zarap shegetin Kalachı aýylynan taǵy birneshe otbasyn kóshirý josparlanyp otyrǵanyn atap ótti.
«Biz Kalachı turǵyndaryn Esil jáne Derjavınsk qalasyna kóshirýdi sheshtik. Derjavınsk qalasynda úsh úıdi qalpyna keltirdik. Degenmen, turǵyndar asyǵar emes. Sondyqtan, biz kelisim bergen 18 otbasyn qyrkúıek aıyna deıin kóshirýdi josparlap otyrmyz. Al, qalǵan adamdardyń óz erkinde. Sonda qalamyn degenderge jaǵdaı jasaıtyn bolamyz. Biraq ta, mynandaı múmkindikti jiberip almaǵany durys. Qyrkúıek aıyna deıin oılanýǵa ýaqyt beremiz. Kóshpeımiz dese, Esil jáne Derjavınsk qalalarynda olarǵa arnalǵan páterlerdi onda jetim balalarǵa beretin bolamyz», - dedi aımaq basshysy óz sózinde.
Sapar sońynda aımaq basshysy Esil aýdanynyń da egistik alqaptaryn aralap shyǵyp, aýyl sharýashylyǵy taýarlaryn óndirýshilermen kezdesti.
