Qyrkúıek aıynda elimizdegi jumyssyzdyq deńgeıi 5 paıyzdy qurady

ASTANA. QazAqparat - Elimizdiń ekonomıkasynda 2014 jylǵy qyrkúıektegi baǵalaý boıynsha 8,7 mln. adam jumyspen qamtyldy. Sóıtip, ótken jylǵy sáıkes kezeńge qaraǵanda olardyń sany 71 myń adamǵa nemese 0,8 paıyzǵa kóbeıdi.

Ulttyq ekonomıka mınıstrligi Statıstıka komıtetiniń habarlaýynsha, qyrkúıek aıynda jaldamaly qyzmetkerlerdiń sany 6,1 mln. adamdy quraǵan, bul jumyspen qamtylǵandardyń jalpy sanynyń 70 paıyzy. Sonymen qatar, 2014 jylǵy III toqsandaǵy aldyn ala derekteri boıynsha óz betinshe jumyspen qamtylǵandardyń jalpy sanynan jumyspen nátıjeli qamtylǵandar úlesi 71,2 paıyzdy, jumyspen nátıjesiz qamtylǵandar - 28,8 paıyzdy qurap otyr.

«2014 jylǵy qyrkúıekte jumyssyzdar sany 458,1 myń adamdy qurap, jumyssyzdyq deńgeıi 5,0 aıyz boldy. Jumyspen qamtý organdarynda 2014 jylǵy qyrkúıek aıynyń sońyna 55,9 myń adam («Jumyspen qamtý 2020 jol kartasy» baǵdarlamasyna qatysatyndar quramyna engizilgen tulǵalardyń esebinsiz) resmı tirkelgen. Tirkelgen jumyssyzdar úlesi ekonomıkalyq turǵydan belsendi halyqtyń 0,6 paıyzyn qurady», delingen baspasóz baıanynda.