Qyrkúıek aıynda Atyraýda 8 myńǵa jýyq búldirshin mektepke barady
ATYRAÝ. QazAqparat - Atyraýda 2 qyrkúıek kúni 7800 búldirshin mektep partasyna otyrady. Olardyń jartysy qurylysy bitken úsh jańa mektepte oqıdy, dep habarlady «QazAqparat» HAA tilshisi.
«Aqjaıyq aýylynda 120 adamdyq M.Otaralıev atyndaǵy mektep paıdalanýǵa berildi. 1 qyrkúıekte Nursaıa aýdanyndaǵy 624 oryndyq jańa mekteptiń ashylýy josparlanǵan, osy shaǵynaýdanda 624 orynǵa arnalǵan mamandandyrylǵan tehnıkalyq gımnazııa jumysyn bastaıdy. Eger 2016-2017 oqý jylynda oqýlyqtar men oqý quraldaryn alýǵa 494 mln 131 myń teńge jumsalǵan bolsa, bıyl 1 mlrd 154 mln 131 myń teńge qarjy bólingen», - dep habarlady qalalyq bilim bóliminiń basshysy Sveta Amanshıeva. Sonymen qatar, balalarǵa 9 jańa avtobýs bólingen. Budan bylaı №5, 6, 25, 32 - Erkinqala OM, Tasqala aýylyndaǵy T. Amandosov atyndaǵy mektep, Jańatalap aýylyndaǵy Jambyl atyndaǵy mektep, Damba aýylyndaǵy Amangeldi atyndaǵy jáne Tomarly aýylyndaǵy K.Smaǵulova atyndaǵy mektep oqýshylary bilim uıasyna qıyndyqsyz jete alady. Mektep oqýshylaryna jol júrý ázirge tegin, sondaı-aq 1-4 synyp aralyǵyndaǵy barlyq oqýshylarǵa ystyq tamaq ta tegin beriledi.
