Qyrǵyzstannyń jańa Konstıtýtsııasynyń jobasynda Prezıdenttiń ókilettiligi aıtarlyqtaı qysqartylǵan - Qyrǵyzstan Elshisi
ASTANA. Maýsymnyń 3-i. QazAqparat /Ernur Aqanbaı/ - Qyrǵyz Respýblıkasynyń jańa Konstıtýtsııasynyń jobasyna sáıkes, Prezıdenttiń ókilettiligi aıtarlyqtaı qysqartylǵan. Bul týraly búgin Astanada 2010 jylǵy maýsymnyń 27-de Qyrǵyz Respýblıkasy Konstıtýtsııasyn qabyldaý máseleleri jónindegi referendýmdy ótkizýge arnalǵan baspasóz máslıhatynda Qyrǵyzstannyń Qazaqstandaǵy Tótenshe jáne Ókiletti elshisi Janysh Rústenbekov aıtty,
dep habarlaıdy QazAqparat.
Elshiniń aıtýynsha, burynǵy júıe boıynsha Prezıdent eldegi basty saıası tulǵa boldy. Prezıdent Premer-Mınıstrden bastap aýdan ákiminiń orynbasaryna deıin ózi taǵaıyndaǵan. Al, jańa Konstıtýtsııanyń jobasy boıynsha Prezıdent qarjylyq ta, ekonomıkalyq ta retteýge qatyspaıdy, Úkimettiń kadrlyq saıasatyna aralasa almaıdy. «Deıturǵanmen, Memleket basshysynyń rólin baǵalamaýǵa bolmaıdy. Búkil halyq saılaǵan Prezıdent derbes jáne táýelsiz tulǵa bolyp qalady. Daý-damaılardy sheshýde arbıtr bola alady, konstıtýtsııalyq qurylystyń kepili, Joǵarǵy Bas Qolbasshy bolyp tabylady. Osynyń barlyǵy Prezıdentke partııalardyń nemese basqarýshy koalıtsııanyń saıası óktemdikti qalyptastyrýdaǵy áreketteriniń aldyn-alýǵa múmkindik beredi», dedi J. Rústenbekov. Onyń sózine qaraǵanda, beıtarap ustanymdy saqtaý jáne bir ǵana partııaǵa táýeldi bolmaý úshin Prezıdent tikeleı búkilhalyqtyq daýys berý arqyly saılanady. Qyrǵyzstannyń jańa Konstıtýtsııasynyń jobasynda Prezıdentten barlyq ókilettilikter alynyp tastalǵan. «Buryn Prezıdentti jáne onyń otbasyn qorǵaý memlekettiń dotatsııasynda bolatyn. Qazir Prezıdentten barlyǵy alynyp tastaldy, Prezıdent jalaqysyna ómir súretin bolady. Buryn memlekettiń qamsyzdandyrýynda bolsa, endi Qyrǵyzstannyń barlyq eńbekshileri sııaqty aılyǵyna ómir súredi», dedi ol.
Elshiniń aıtýynsha, jańa Konstıtýtsııa boıynsha Premer-Mınıstr men Úkimet múshelerin Parlament jasaqtaıdy. Olar Parlamentke esep beredi. Parlament tarapynan qysym kórsetý múmkindigin boldyrmaý úshin Úkimet Parlamenttiń aldyna ózine senim kórsetý týraly másele qoıa alady. Jogarký Kenesh Úkimetke senimsizdik bildirgen jaǵdaıda Prezıdent Jogarký Keneshtiń merzimnen buryn saılaýyn jarııalaýǵa nemese Úkimetti otstavkaǵa jiberýge quqyǵy bar.
Elshi Jogarký Keneshtiń depýtattary partııalyq tizim boıynsha saılanatynyn, saılaýdyń tepe-teńdik júıesi qarastyrylǵanyn atap ótti. «Saılaýda jeńiske jetken partııa tipti 90 paıyz daýys jınaǵan kúnniń ózinde 120 oryndyq Jogarký Keneshte asyp ketkende 65 oryndy ǵana ıelene alady. Qalǵan 55 depýtattyq mandattar basqa partııalarǵa beriledi. Bul degenimiz - saılaýda jeńgen partııa zańdy túrde óz Úkimetin qalyptastyra alady degendi bildiredi, alaıda olardyń daýystary konstıtýtsııany ózgertýge jáne bılikke zorlyq kórsetýge jetpeıdi», deıdi ol.
J. Rústenbekovtiń aıtýynsha, tutastaı alǵanda Qyrǵyzstannyń jańa Konstıtýtsııanyń jobasy óziniń mazmuny boıynsha partııalyq Parlamentti damytýdy, Úkimettiń Parlamentke eseptiligin, ekonomıka jáne saıası máseleler boıynsha prezıdenttik bılikti shekteýdi kózdeıdi.
