Qyrǵyzstannyń Jalalabad oblysynda tobyr Q.Bakıevtiń úıin órtep jiberdi
ASTANA. Mamyrdyń 15-i. QazAqparat - Qyrǵyzstannyń Jalalabad oblysynda tobyr Qurmanbek Bakıevtiń atadan qalǵan úıin jáne onyń týystarynyń úıin órtep jiberdi, dep habarlady RBK agenttigine ýaqytsha úkimettegi derekkóz. Derekkózdiń aqparaty boıynsha, barlyǵy úsh úı órtelgen: bireýi - eldiń es-prezıdentiniki, ekeýi - onyń inileriniń úıi.
Aldyn ala málimetter boıynsha, qurban bolǵandar men zardap shekkender joq, óıtkeni úı órtengen kezde onda eshkim bolmaǵan. Derekkózdiń aıtýynsha, keshke Bakıevterdiń týǵan aýyly Teıit aýylyna shamamen 100-150 adam kelip jetip, Q.Bakıevtiń otbasynyń úılerin órtegen. Burynǵy memleket basshysynyń aýyldastarynyń úıleri zardap shekpegen.
Eks-prezıdenttiń jáne onyń inileriniń úılerin órtegender Q.Bakıevtiń Qyrǵyzstanǵa kelýin qalamaǵan ýaqytsha úkimettiń jaqtastary bolýy múmkin.
Ýaqytsha úkimet basshysy Roza Otynbaevanyń pikirinshe, Q.Bakıevtiń jaqtastarynyń Qyrǵyzstanda tóńkeris jasaý áreketi eks-prezıdenttiń elge kelýin jeńildetýi tıis bolǵan, ol shamamen mamyrdyń 17-sine josparlanǵan. R.Otynbaeva úkimet burynǵy memleket basshysy jaqtastarynyń óz oılaryn júzege asyrýǵa jol bermeıtinin málimdedi.
Esterińizge sala keteıik, búgingi Jalalabadtaǵy tártipsizdikter kezinde 3 adam qaza tapty, sondaı-aq 63 adamnyń zardap shekkeni habarlandy. Keshe Q.Bakıevtiń jaqtastary eldegi 3 oblystyq ákimshilik úılerin basyp aldy, mamyrdyń 14-inde Qyrǵyzstannyń ýaqytsha úkimeti Jalalabadqa jaǵdaıdy turaqtandyrý úshin ishki áskerler men arnaıy qyzmet kúshterin attandyrdy.
