Qyrǵyzstannyń ýaqytsha úkimeti Bakıevterdi ustap bergenderge syıaqy taǵaıyndap otyr
ASTANA. Sáýirdiń 30-y. QazAqparat - Qyrǵyzstannyń ýaqytsha úkimeti sáýirdiń 7-sinde adamdardy jappaı qyrýǵa kináli tulǵalardy ustap bergenderge aqshalaı syılyqtar taǵaıyndap otyr.
Bul týraly búgin «Halyq senimi úkimeti» tóraǵasynyń orynbasary Almazbek Atambaev málim etti.
«Kináliler» dep eldiń burynǵy prezıdenti Qurmanbek Bakıev, onyń baýyry Janyshbek jáne uldary Maksım men Marat Bakıevter aıtylyp otyr, dep habarlaıdy RBK agenttigi.
Olardyń barlyǵy, sáýirdiń 7-sinde Úkimet úıin shabýyldaǵan demonstranttarǵa qarsy oq atýǵa buıryq berdi dep aıyptalyp otyr. Mıtıngke qatysýshy 80-nen astam adam atys-shabystyń saldarynan qaza bolyp, kóshedegi tártipsizdikterge qatysýshy taǵy 1,5 myńnan astam adam jaraqat alǵan bolatyn.
Qyrǵyz Respýblıkasynyń Bas prokýratýrasy osy fakti boıynsha Bakıevterge qarsy qylmystyq is qozǵady.
Aleksandr Lýkashenkonyń shaqyrýy boıynsha qazir Belarýs elinde júrgen Qyrǵyzstannyń burynǵy prezıdenti Qurmanbek Bakıev jaqynda qol suǵylmaýshylyq ımmýnıtetinen aırylǵan edi. Onyń sońǵy málimdemelerine súıensek, ol prezıdenttik qyzmetine «núkte qoıdy» jáne Qyrǵyzstanǵa oralmaq emes. Degenmen, Q.Bakıev áli is júzinde memleket basshysy bolyp qalyp otyrǵanyn, sebebi Jogorký Keńesh onyń otstavkasyn qabyldamaǵanyn aıtyp otyr.
