Qyrǵyzstannyń parlament depýtattaryna «bılikti jaýlap alýǵa áreket etý» aıyby taǵylyp, qylmystyq is qozǵaldy
ASTANA. 4 qazan. QazAqparat - Qyrǵyzstan parlamentindegi «Ata-Jurt» fraktsııasynyń depýtattary Sadyr Japarov, Qamchybek Táshıev,
Talant Mamatov pen basqa da laýazymdy tulǵalarǵa qatysty Qyrǵyzstan Respýblıkasy QK-niń 295-baby (bılikti kúshtep basyp alýǵa áreket etý) jáne QR QK-niń 297-baby (bılikti qulatýǵa buqaralyq úndeý jasaý) boıynsha qylmystyq is qozǵaldy.
Bul týraly «Kabar» agenttigine K. Táshıevtiń qorǵaýshysy - Ikramıdın Aıtkýlov aıtty, dep habarlady RBK.
Kúdiktiler qozǵalǵan qylmystyq is boıynsha barlyq jaǵdaıdy anyqtalǵanǵa deıin 48 saǵatqa Memlekettik Ulttyq qaýipsizdik komıtetiniń tergeý abaqtysyna qamalady.
Esterińizge sala keteıik, jýyrda Bishkekte S. Japarov pen K. Táshıev «Kýmtor» altyn-ken ornyn ulttandyrý talabymen Ala-Too ortalyq alańynda mıtıng uıymdastyrdy. Ereýil bastalǵannan birneshe saǵattan keıin K. Táshıevtiń basshylyǵymen jáne onyń buıryǵymen mıtıngke shyqqandar Aq úıge baryp, onyń qorshaýynan ótpekshi bolǵan. Biraq quqyq qorǵaý organdary arnaıy quraldardy qoldana otyryp, ereýilge shyqqandardyń bul zańsyz áreketteriniń aldyn aldy. Budan keıin ereýilshiler tarqatyldy.
