Qyrǵyzstannyń OSK basshysy saılaý men referendýmǵa daıyndyq týraly aıtty
BІShKEK. QazAqparat - Jańa engiziletin saılaý úlgisi Qyrǵyzstanda jalǵan daýys berýshilerdiń bolýyn tyıady. Bul týraly búgin «Qyrǵyz Respýblıkasyndaǵy saılaý reformasy: jetistikter men odan ári damý» atty dóńgelek ústel otyrysynda Qyrǵyzstannyń Ortalyq saılaý komıssııasynyń basshysy Nýrjan Shaıldabekova aıtty dep habarlaıdy QazAqparattyń Bishkektegi tilshisi.
«Biz saılaý arqyly azamattardyń keıbir ınstıtýttarǵa degen joǵaltqan senimin qaıtarýdy josparlap otyrmyz. Árıne, odan ári damytýdy qajet etetin keleńsizdikter de bar. Biz osy baǵytta jumys isteýge daıynbyz. Bul tek qalyptasqan úderis qana emes, sonymen qatar saılaý úderisi qatysýshylardyń qarym-qatynastarynyń kesheni. Bul rette problemalardyń da bar ekenin aıta ketý kerek. Saılaýdyń saıası mádenıetiniń bolýy óte mańyzdy. Sol sebepti biz júzege asyrǵaly otyrǵan jobalardyń biri saılaý úderisiniń qatysýshylarynyń quqyqtyq mádenıetin kóterý jáne jalpy saılaý úderisine baılanysty mádenıetti jetildirýge baǵyttalǵan»,-dedi OSK basshysy.
Sonymen qatar ol jańa saılaý úlgisin qoldaný jemqorlyq áreketteriniń tyıylýyna, daýys berýdi burmalaý, saılaý úderisin basqarý áreketteriniń aldyn alýǵa yqpal etetindigine senimdi. Jańa saılaý júıesiniń jetistikteri týral jıynǵa qatysýshylarǵa OSK tóraǵasynyń orynbasary Ábdijappar Bekmatov aıtyp berdi.
«Jańa saılaý júıesiniń negizgi ustanymy - «bir adam - bir daýys». Jańa avtomatty qurylym, daýystardy kóbeıtý, bıýlletenderdiń sanyn arttyrý, saılaýdyń qorytyndysyna áser etý sııaqty qıturqy árketterge jol bermeıdi»,-dedi OSK tóraǵasynyń orynbasary.
Onyń sózinshe, osy ýaqytta osyndaı jańa ashyqtyq pen jarııalylyqtyń saltanat qurýyna yqpal etetin avtomattandyrylǵan daýys berý júıelerin engizý baǵytynda keshendi sharalar atqarylýda.
Qazirgi tańda eldegi 2365 saılaý ýchaskesi tehnıkalyq jaǵynan tolyqtaı qamtamasyz etilgen.
Dóńgelek ústel otyrysyna 25 elden 200-ge jýyq halyqaralyq baıqaýshylar qatysty. Olardyń arasynda ShYU, TMD sııaqty halyqaralyq deńgeıdegi irgeli uıymdar da bar.
Aıta keteıik, keshe Qyrǵyzstanda Konstıtýtsııaǵa ózgeris engizý boıynsha búkilhalyqtyq referendým aldyndaǵy «Tynyshtyq kúni» bastaldy. Sondaı-aq jergilikti keneshterge de ókilder saılanbaq. Saılaý 11 jeltoqsanǵa josparlanǵan.
