Qyrǵyzstannyń Ortalyq saılaý komıssııasy saılaý nátıjelerin osy aptada jarııa etedi - Felıks Kýlov
BІShKEK. Qazannyń 27-si. QazAqparat /Arnur Rahymbekov/ - Búgin Bishkekte «Ar-Namys» saıası partııasynyń kóshbasshysy Felıks Kýlov baspasóz máslıhatyn ótkizip,
onyń barysynda óz jaqtastarynyń josparlap qoıǵan mıtıngisiniń ótkizilmeı qalýynyń sebepterin túsindirdi, dep habarlaıdy bizdiń tilshimiz.
Aldyn-ala málimet boıynsha parlamenttik saılaýda úshinshi orynǵa ıe bolǵan «Ar-Namys» partııasy Qyrǵyzstan astanasynda óz jaqtastarynyń birneshe mıtıngisin ótkizýdi josparlap otyr. «Ar-namystyqtardyń» mıtıngi ótkizýdegi maqsaty - qazannyń 10-ynda ótkizilgen saılaýdyń resmı nátıjelerin jarııalaýdy tezdetý bolýy kerek edi.
Felıks Kýlovtyń aıtýynsha, qazannyń 26-synda QR Prezıdenti Roza Otynbaevamen jáne Qyrǵyzstannyń Sotsıal-Demokratııalyq partııasynan ózge alda kele jatqan partııa basshylarymen kezdesý barysynda, Ortalyq saılaý komıssııasynyń basshysy Aqylbek Sarıev keıbir saılaý ýchaskelerindegi hattama málimetterin naqtylaýǵa qatysty belsendi sharalar júrgizilip jatqanyn jetkizdi. Osy aptanyń aıaǵyna deıin barlyq jumystardy aıaqtap, saılaý nátıjelerin jarııa etýge de ýáde bergen syńaıly.
«Biz búgin saılaý nátıjelerin tezdetip jarııa etýdi talap etip mıtıng ótkizbekshi edik. Biraq, Aqylbek Sarıevtiń sózinen keıin biz aktsııany ótkizbeımiz dep sheshtik», - dedi Felıks Kýlov. «Ar-Namys» kóshbasshysy sondaı-aq qyrǵyzstandyq ekonomıkanyń «daǵdarystyq jaǵdaıynda» onyń partııasynyń prezıdenttik basqarý formasy úshin kúresip jatqanyn da tilge tıek etti.
