Qyrǵyzstannyń ońtústigindegi úılerdiń qurylysy salqyn túskenshe aıaqtalady - J.Satybaldıev
BІShKEK-JALAL-ABAD. Qazannyń 4-i. QazAqparat /Arnur Rahymbekov/ - Qyrǵyz Respýblıkasy Úkimetiniń vıtse-premer mınıstri, Osh jáne Jalal-Abad qalalaryn qalpyna keltirý jáne damytý memlekettik dırektsııasynyń bas dırektory Jantoro Satybaldıev Jalal-Abad oblysynda boldy.
Jalal-Abad qalasynda, Jalal-Abad oblysynyń Bazar-Qorǵon jáne Sozaq aýdandarynda J.Satybaldıev maýsym aıyndaǵy qaıǵyly jaǵdaılar kezinde zardap shekken otbasylarǵa ótpeli jáne kópqabatty úılerdiń qurylys barysymen tanysyp qaıtty.
Óziniń saparyna túsinik bergen Qyrǵyzstan vıtse-premer-mınıstri Jalal-Abad oblysyndaǵy qurylys jumystarynyń qarqynyn Osh qalasy men Osh oblysyndaǵymen salystyrǵanda «qanaǵattanarlyq» dep sanaýǵa bolatynyn atap ótti. «Muny túrli obektıvti sebeptermen túsindirýge bolady. Eń zardap shekken Osh qalasynda qurylys jasaýdan buryn halyq arasynda túsindirý jumystary júrgizildi, osynyń arqasynda biraz ýaqyt joǵaltyp alyndy», - dep málimdedi J.Satybaldıev.
Onyń aıtýynsha, qazirgi kúni Jalal-Abad oblysynda qurylys materıaldarymen qamtamasyz etýde qıynshylyqtar týyndap otyr. «Eki-úsh kún ishinde bul problema sheshiledi», - dep túsindirdi ol. J.Satybaldıev salqyn túskenshe respýblıkanyń ońtústigindegi úılerdiń qurylysy aıaqtalatyna, al 2011 jyldyń kókteminde bul úıler 100 sharshy metrge deıin odan ári qurylatynyna senim bildirdi.
Sonymen qatar, memlekettik dırektsııanyń bas dırektory óziniń qol astyndaǵylarǵa qurylys jumysynyń qarqynyn arttyrýǵa jáne qurylys grafıgin bir nemese eki aptaǵa deıin qysqartýǵa tapsyrma berdi.
