Qyrǵyzstannyń ońtústiginde jańa shekara zastavasy qurylmaq
BІShKEK. 3 mamyr. QazAqparat /Arnur Rahymbekov/ - Qyrǵyzstan Prezıdenti Roza Otynbaeva Batken oblysynda jumys saparymen júr.
Prezıdenttiń baspasóz qyzmetinen habarlaǵandaı, R.Otynbaeva 2 mamyr kúni Batken oblysyndaǵy shekara zastavalaryn aralady. Qyrǵyzstan Prezıdenti at basyn tiregen birinshi nysan - Qulyndy» shekara zastavasy boldy.
Qyrǵyz Respýblıkasy Shekara qyzmeti basshysynyń orynbasary Sholponbek Turysbekov el Prezıdentin memlekettik shekarany kúzetý júıesin jetildirý jospary týraly habardar etti, týyndap otyrǵan problemalar men qıynshylyqtarǵa da toqtaldy. R.Otynbaeva hanym óz kezeginde, áleýmettik-ekonomıkalyq problemalardy sheshý arqyly shekara irgesindegi halyqtyń áleýetin nyǵaıtý qajettiligin atap kórsetti.
Qyrǵyz Prezıdenti odan keıin «Internatsıonal-Maqsat» aınalma jolynyń qurylysymen tanysty, «Dostyq» shekara zastavasynda boldy. Saparynyń sońynda R.Otynbaeva Arqa alqabyna at basyn tirep, ony damytý jónindegi keshendi josparmen tanysty. Sondaı-aq osy ýchaskede memlekettik shekarany kúzetý jáne esirtki trafıgi men transshekaralyq qylmysqa tosqaýyl qurý maqsatynda qurylǵaly otyrǵan «Arqa» shekara zastavasynyń jobasymen tanysty.
