Qyrǵyzstannyń ońtústiginde sel saldarynan kópir buzylyp, úı mańyndaǵy aýmaqtardy sý basty
BІShKEK. QazAqparat - Qyrǵyzstannyń ońtústik aımaqtarynda tolassyz jańbyr saldarynan kópir buzylyp, úılerdiń ýchaskelerin sý basty. Bul týraly Qyrǵyzstan Respýblıkasynyń Tótenshe jaǵdaılar mınıstrliginiń baspasóz qyzmetinen habarlady.
«Jalal-Abad oblysy Ala-Buka aýdanynyń Kosh-Bolot aýylynda 17 mamyrda saǵat 14:00-de jaýyn saldarynan sel týyndap, 4 turǵyn úıdiń baqshalary men qora-qopsysyn sý basty, ishkisharýashylyq joldar qıyrshyq tastarmen toltyryldy», - dep atap ótti vedomstvoda.
Aqparat boıynsha, Teńge aýylynda sel Kókserek ózenindegi Akparalıeva kóshesi boıynda ornalasqan kópirge zaqym keltirdi. Sondaı-aq sel Kókserek ózenindegi Karatopyraq kóshesi boıyndaǵy kópirdi buzdy. Onyń saldarynan 22 januıaǵa baratyn jol kesildi. Aqtaılak aýylynda osy ózenniń Sheıit-Mazar ýchaskesinde kópirdiń bir bóligi qırap, tórt aýylǵa baratyn jol jabyldy.
«Tash-Aryq aýylynda 100 januıany sýmen qamtyǵan júıege zaqym keldi. Shakaftar aýylynda da osyndaı jaǵdaı oryn aldy», - dep habarlady TJM.
