Qyrǵyzstannyń ońtústiginde saıası partııalar men jergilikti bılik organdary saılaýdy ádil ótkizý týraly memorandýmǵa qol qoıady
BІShKEK. Qyrkúıektiń 15-i. QazAqparat /Arnur Rahymbekov/ - Jalal-Abadta oblys gýbernatory Bektur Asanovtyń aldaǵy parlament saılaýyna qatysatyn saıası partııalardyń oblystyq úılestirýshilerimen kezdesýi ótti.
Kezdesý barysynda oblys gýbernatory saılaý kezinde saıası mádenıet normalarynyń saqtalý qajettiligi men saılaý aldyndaǵy nasıhattaý jumystarynda zańnama talaptarynyń oryndalý kerektigin aıta kelip, bul saılaýdyń ádil ótýine septigin tıgizedi dep atap ótti.
Іs-sharaǵa qatysýshylar saılaýaldy naýqan kezinde barlyq partııalarǵa birdeı jaǵdaı jasalýyn jáne saıası partııalardyń birine ákimshilik resýrstardyń qoldanylý múmkindiginiń shektelýine toqtalyp ótti. Sonymen qatar, olar eldegi saıası jaǵdaıdy qıyndatpaı, saılaýdy ádil ótkizý úshin birlese is-qımyl jasaý jónindegi memorandýmǵa qol qoıý týraly usynystaryn jetkizdi.
Jalal-Abad oblysynyń gýbernatory ákimshilik resýrstyń qoldanylmaıtyndyǵyna jáne de saılaý úderisine jergilikti bılik músheleriniń aralasý faktisi anyqtalsa, ol laýazymdy tulǵa birden jumystan shyǵarylatyndyǵyna sendirdi. Ol sondaı-aq osyndaı formattaǵy kelesi kezdesý endi qyrkúıektiń 25-i kúni ótip, memorandým mátini talqylanyp, oǵan qol qoıylatyndyǵyn habarlady.
