Qyrǵyzstannyń memlekettik qaryzdary shegine jetti - HVQ
ASTANA. QazAqparat - Qyrǵyzstannyń memlekettik beresheginiń deńgeıi shegine jetti jáne bul elde daǵdarys ornaýy ábden múmkin. Bul týraly Halyqaralyq valıýta qorynyń Qyrǵyzstandaǵy mıssııasynyń basshysy Edvard Djemaıel baspasóz máslıhatynda málim etti, dep jazady kyrtag.kg.
«Qyrǵyzstannyń memlekettik qaryzdary sońǵy 2-3 jylda aıtarlyqtaı ósip ketti. 2014 jyly onyń kólemi orta eseppen alǵanda, JІÓ-niń 43-44 paıyzyn quraıtyn. Qazir ol 70 paıyzǵa jetip qaldy jáne bul jaǵdaı úlken alańdaýshylyq týdyryp otyr. Bizdińshe, eldiń qaryzy daǵdarys táýekeliniń tózimdi deńgeıinde. Alaıda, ol shegine jetip qaldy jáne aldaǵy ýaqytta jaǵdaı ábden múshkil bolýy múmkin», - dedi Djemaıel.
Onyń sózinshe, bul úkimet úshin syrttan tartylatyn zaımdar ósedi degen sóz. Al, resýrstardy áleýmettik-ekonomıkalyq damý baǵytyna bólý múmkindikteri azaıady. «Osyǵan baılanysty biz resmı organdarǵa bul máselege saqtyqpen qaraýǵa keńes beremiz», - dedi HVQ mıssııasynyń basshysy.
Aıta keteıik, Djemaıel basqaratyn HVQ-nyń mıssııasy Bishkekte 2016 jyldyń 15-28 qyrkúıegi aralyǵynda boldy. Sapardyń maqsaty - Keńeıtilgen nesıe tetikteri boıynsha kelisimder negizinde baǵdarlamanyń 3-shi sholýyn ótkizý bolyp tabylady.
Aıta keteıik, 2016 jyldyń 31 shildesi kúngi málimetter boıynsha Qyrǵyzstannyń memlekettik qaryzy 4 mlrd, 72,2 mln-dy qurady. Onyń ishinde syrtqy qaryz 3 mlrd 762,6 mln bolyp otyr.
