Qyrǵyzstannyń Mádenıet mınıstrligi TikTok jelisin buǵattaý týraly sheshim qabyldady
ASTANA. QazAqparat – Qyrǵyzstannyń Mádenıet, aqparat, sport jáne jastar saıasaty mınıstrligi el aýmaǵynda TikTok áleýmettik jelisin buǵattaý týraly sheshim qabyldady, dep habarlaıdy QazAqparat Kabar qyrǵyz ulttyq aqparat agenttigine silteme jasap.
Vedomstvonyń baspasóz qyzmetiniń málimetinshe, mınıstrliktiń atyna birqatar úkimettik emes uıymnyń TikTok jelisiniń balalardyń psıhıkalyq damýy men densaýlyǵyna teris áser etetini týraly alańdaýshylyǵy kúsheıgen.
Onda TikTok paıdalanýshyny qysqa klıpterdiń vırtýaldy álemine jeteleıtini, jasóspirimder belgili bir beınelerdi qaıtalaýǵa tyrysatyny, tipti keıbiri ómirge qaýip tóndiretini jazylǵan. Sonymen birge, balalar psıhıkasy endi qalyptasyp jatqany, onyń áli de turaqsyz ekeni jáne mundaı kontent táýeldilik týdyryp, jas urpaqtyń emotsıonaldy jaǵdaıyna teris yqpal etetini aıtylǵan.
«Osyǵan baılanysty mınıstrlik atalǵan áleýmettik jeliniń kontentine monıtorıng júrgizip, platforma tarapynan balalardyń densaýlyǵy men damýyna zııan keltiretin aqparatqa qol jetkizýdi shekteý, jas sanatyn baqylaý fýnktsııalary joq ekenin anyqtaǵan. Osylaısha, kóptegen ótinishti eskerip, júrgizilgen monıtorıng negizinde Qyrǵyzstan aýmaǵynda TikTok servısin taratý qyzmetin toqtatý týraly sheshim qabyldandy», - delingen habarlamada.
Bul sheshim Qyrǵyz Respýblıkasynyń zańnamasy sheńberinde odan ári iske asyrý úshin eldiń Tsıfrlyq damý mınıstrligine jiberilgen.
