Qyrǵyzstannyń kúsh qurylymdary eldegi jaǵdaıdy turaqtandyrý týraly hattama qabyldady
BІShKEK. QazAqparat – Qyrǵyz Respýblıkasynyń kúshtik, áskerı jáne quqyq qorǵaý qurylymdarynyń basshylary eldegi jaǵdaıdy turaqtandyrýǵa baǵyttalǵan hattama qabyldady, dep habarlaıdy QazAqparat Kabar agenttigine silteme jasap.
8 qazanda Qyrǵyz Respýblıkasynyń Memlekettik ulttyq qaýipsizdik komıteti (MUQP) kollegııasynyń zalynda Qyrǵyzstannyń Qaýipsizdik keńesiniń hatshysy mindetin atqarýshy, kúshtik qurylymdar men quqyq qorǵaý organdarynyń úılestirýshisi O.Sývanalıevtyń tóraǵalyǵymen otyrys bolyp ótti. Bul týraly MUQP baspasóz qyzmeti habarlady.
Otyrysqa respýblıkadaǵy Qaýipsizdik keńesiniń hatshylyǵy men kúshtik, áskerı jáne quqyq qorǵaý qurylymdarynyń basshylary qatysty.
Otyrysta eldegi qoǵamdyq-saıası ahýaldy turaqtandyrý máseleleri men azamattardy, qoǵam men memleketti qorǵaý úshin arnaıy qyzmet, quqyq qorǵaý organdary men Qarýly Kúshterdiń jumysyn jedel túrde úılestirý máseleleri talqylandy. Sonymen qatar Qyrǵyz Respýblıkasynda bolyp jatqan syn-qaterler men qaýip-qaterlerge ýaqtyly den qoıý jáne memlekettik basqarý júıesin zańdy arnaǵa qaıtarý máselesi pysyqtaldy.
O.Sývanalıevtiń Qyrǵyz Respýblıkasyndaǵy ahýal týraly aqparatyn tyńdaǵannan keıin jınalǵandar «2020 jyldyń 5 qazanyndaǵy oqıǵalarǵa baılanysty Qyrǵyz Respýblıkasynda qaýipsizdik pen zańdylyqty qamtamasyz etý sharalary týraly» Hattamany qabyldady.
Hattama 12 tarmaqtan turady. Onda qaýipsizdik pen zańdylyqty qamtamasyz etýge baǵyttalǵan negizgi basymdyqtar bekitilgen.
Qyrǵyz Respýblıkasynyń barlyq kúsh qurylymdary eldegi turaqtylyqty qamtamasyz etý úshin túsinistik tanytyp, birigýi kerek.
Sonymen qatar jeke quramnyń moraldyq-psıhologııalyq jaǵdaıyn jaqsartý boıynsha qajetti sharalardy qabyldaý, jeke quramnyń ómiri men densaýlyǵynyń qorǵalýyn, sondaı-aq qarý-jaraqtyń, oq-dárilerdiń, áskerı, arnaıy jáne ózge de tehnıka men múliktiń saqtalýyn qamtamasyz etý máseleleri maquldandy.
Barlyq deńgeıde, sonyń ishinde erikti halyq saqshylaryn tarta otyryp, naqty jáne jan-jaqty ózara árekettesýdi qamtamasyz etý mindeti kelisildi. Arnaıy sharalardy júrgizý barysynda fýnktsııalar, mindetter, ókilettikter men jaýapkershilik salalaryn naqty belgileı otyryp, turaqsyzdyqtyń yqtımal oshaqtarynda arnaıy is-sharalardyń biryńǵaı birlesken josparyn ázirleý jáne qabyldaý kózdelip otyr.
Sondaı-aq, hattamaǵa sáıkes, eldegi qylmystyq ahýaldyń nasharlaýyna jol bermeý, qylmyskerlerdiń respýblıkadaǵy túrli saıası kúshterge yqpal etý áreketterin, memlekettik organdardy turaqsyzdandyrýǵa talpyný umtylystaryn qatań jolmen tyıý týraly sheshim qabyldandy. Qylmyskerler men uıymdasqan qylmystyq toptardyń áreketterin beıtaraptandyrý, onyń ishinde zańsyz saqtalǵan qarý-jaraq pen oq-dárilerdi tárkileý boıynsha belsendi sharalar júrgizý josparlanýda. Qylmystyq-atqarý júıesi mekemelerindegi jaǵdaıdyń turaqsyzdyǵyna jol bermeý jáne arnaıy kontıngentke qylmystyq elementterdiń syrttan áserin boldyrmaý boıynsha sharalar qabyldaý jóninde ortaq sheshim jasaldy.
Strategııalyq jáne basqa da mańyzdy nysandardyń kúzetin kúsheıtip, memlekettik jáne jeke menshik nysandardyń qaýipsizdigi qamtamasyz etiledi.
Destrýktıvti sıpattaǵy kúshterdiń eldegi qoǵamdyq-saıası ahýaldy turaqsyzdandyrýǵa baǵyttalǵan barlyq áreketin, sonyń ishinde aımaqaralyq jáne etnosaralyq negizdegi arandatýshylyq áreketterdi, sondaı-aq memlekettik organdardyń qyzmetine jáne jeke menshikke kedergi jasaý, ártúrli nysandardy ruqsatsyz basyp alý qımyldaryn jedel jáne qatań jolmen basý jospary maquldandy.
Eske salaıyq, jeksenbi, 4 qazan kúni Qyrǵyzstanda Jogorký Keneshke depýtattardy saılaý ótti. Depýtattyq mandatqa 16 partııa úmitkerlik etti. Daýys berýdiń aldyn ala málimeti boıynshy, 7% mejeni 4 partııa eńserdi.
Al, 5 qazan kúni saılaý nátıjesine kóńili tolmaǵan bir top adam ortalyq alańda mıtıng uıymdastyryp, odan keıin Aq úıge bettedi. Olardy tarqatý úshin mılıtsııa kóz jasaýratatyn gaz, sýatqysh jáne gaz-shýyldy qurylǵylar qoldanǵan. Bishkek ýaqytymen saǵat 22.00-degi málim boıynsha, aýrýhanaǵa zardap shekken 16 adam jetkizilgen. Keıingi málimet boıynsha, zardap shekken adamdar sany 911-ge jetti.
Eldiń Іshki ister mınıstrligi mıtıngti uıymdastyrýshylar men partııa basshylaryn óz jaqtastaryn úılerine qaıtarýǵa shaqyrdy.
6 qazanda Qyrǵyz Respýblıkasynyń Prezıdenti Sooronbaı Jeenbekov eldegi saıası jaǵdaıǵa baılanysty málimdeme jasady.
