Qyrǵyzstannyń Qazaqstanǵa qatysty DSU-ǵa narazylyǵy negizsiz

NUR-SULTAN. QazAqparat - Jeneva qalasyndaǵy Dúnıejúzilik saýda uıymy Bas keńesiniń otyrysynda Qyrǵyz Respýblıkasynyń ótinishi boıynsha qazaqstan-qyrǵyz shekarasyndaǵy jaǵdaı talqylandy. Bul jaıynda QR Saýda jáne ıntegratsııa mınıstrliginen málim etti, dep habarlaıdy QazAqparat tilshisi.

Qyrǵyz Respýblıkasynyń ókilderi Qazaqstan Respýblıkasynyń DSU kelisimderiniń keıbir erejelerin buzǵandyǵy týraly narazylyqtaryn bildirgen. Olardyń atap ótýinshe, bul Qyrǵyzstannyń ekonomıkalyq kórsetkishteriniń nasharlaýyna alyp kelgen.

Al Qazaqstannyń BUU janyndaǵy jáne basqa da halyqaralyq uıymdardyń Jenevadaǵy turaqty ókili Janar Aıtjanova Qyrǵyzstannyń shaǵymyn negizsiz dep atady.

Ol Qyrǵyz tarapyna Eýrazııalyq ekonomıkalyq odaq týraly shartqa sáıkes, EAEO-ǵa múshe memleketterdiń aýmaqtary arasynda kedendik deklaratsııalaý men memlekettik baqylaýdy, sonyń ishinde kedendik, kóliktik, veterınarlyq jáne sanıtarlyq baqylaýdy qoldanbastan taýarlardy erkin ótkizý júzege asyrylatynyn eske saldy.

Demek, Qyrǵyz Respýblıkasynan Qazaqstanǵa keletin, onyń ishinde Qazaqstan aýmaǵy arqyly tranzıtpen ótetin barlyq taýarlar kedendik baqylaý talaptarynan bosatylǵan. Osyǵan baılanysty Qyrǵyz Respýblıkasy kótergen máseleler tek qana EAEO zańnamasynyń quqyq qoldaný praktıkasymen baılanysty jáne osy uıymnyń alańynda talqylanýy tıis.

Elshi Aıtjanova sondaı-aq Dúnıejúzilik saýda uıymyna múshe memleketterdiń nazaryn kedendik ákimshilendirýdiń álsizdigine baılanysty Qyrǵyzstandaǵy júıelik problemalarǵa, bul óz kezeginde EAEO múshe memleketterine jalpy bıýdjetinde kedendik baj túsimderiniń tolyq alynbaýyna aýdardy.

«2019 jyldyń ózinde Qyrǵyzstannan Qazaqstan Respýblıkasynyń jalǵan rezıdentterine taýar ákelýdiń 2,6 myńnan astam oqıǵasy anyqtaldy. Sondaı-aq, Reseı Federatsııasynyń aýmaǵyna qyrǵyz taýarlaryn «jalǵan tranzıtti» júzege asyrýdyń 4,8 myńnan astam oqıǵasy anyqtaldy. Olar fakti boıynsha ulttyq bıýdjetke janama salyqtardy (QQS) tólemeı Qazaqstan naryǵynda satyldy», - dep atap ótti Elshi.

Qazaqstan qabyldaǵan sharalar salyqtyq ákimshilendirýdi jáne el bıýdjetine QQS túsimderiniń tolyqtyǵyn qamtamasyz etýge baǵyttalǵan. Sonymen qatar, bul sharalar ishki júk tasymaldaýshylarǵa, EAEO múshe memleketteriniń jáne úshinshi elderdiń júk tasymaldaýshylaryna bir qatarly qoldanylady.

Qorytyndylaı kele, Qazaqstan elshisi Qyrǵyz Respýblıkasyn DSU men EAEO-ǵa kirý kezinde alǵan mindettemelerin tolyq oryndaýǵa, sondaı-aq óz seriktesteriniń ulttyq zańnamalaryn saqtaýǵa shaqyrdy.

Qazaqstandyq tarap, eger qyrǵyz tarapy sot isin bastasa, DSU alańyndaǵy sot protsesi aıasynda óziniń múddeleri men quqyqtyq sharalaryn qorǵaýǵa daıyn.