Qyrǵyzstannyń Qaýipsizdik keńesiniń basshysy eldegi jaǵdaıdyń turaqsyzdaný yqtımaldyǵy týraly áńgimeni teriske shyǵardy
BІShKEK. Qyrkúıektiń 17-si. QazAqparat /Arnur Rahymbekov/ - Búgin Internette birqatar aqparattyq saıttarda qyrkúıektiń 18-20-sy kúnderi Osh qalasynda buqaralyq tártipsizdikterdiń kútilip otyrǵany týraly aqparat paıda boldy.
Qyrǵyzstannyń Qaýipsizdik keńesiniń basshysy Murat Imanqulov málimdeme jasap, ol áńgimelerdi teriske shyǵardy.
«Bizdiń mamandar álgi ósekti taratqan derekkózdi (veb-saıt kginfo.com) tekserdi, biraq ázirge oryndaýshylardy anyqtaı alǵan joq. Bul respýblıkadaǵy qoǵamdyq úderisterge iritki salýǵa baǵyttalǵan naǵyz arandatýshylyq áreket. Meniń oıymsha, halyqtyń arasynda dúrbeleń týǵyzý úshin keıbir kúshter osyndaı aqparattardy ádeıi taratatyn sııaqty. Qarapaıym adamdardy qorqytý ońaı. Al álgiler elimizge qastandyq oılaýshylar. Sondyqtan da, Qyrǵyzstanda eshqandaı tolqý bolmaıdy dep nyq senimmen málimdeımin. Bizdiń mamandar qaıǵyly oqıǵalarǵa jol bermes úshin qoldan kelgenniń bárin jasaýda», dep málim etti Qyrǵyz Respýblıkasynyń Qaýipsizdik keńesiniń basshysy.
