Qyrǵyzstannyń halyq ártisi «Shabyt» festıvaline 20-synshy ret qazylyq etýde
ASTANA. QazAqparat - Elimizdiń túkpir-túkpirinen kelgen halyq aspaptar ansamblderi Astanada ótip jatqan «Shabyt» festıvaliniń «Halyq mýzykasy» nomınatsııasy boıynsha baq synap jatyr, dep habarlaıdy QazAqparat.
Qazylar alqasy úzdik toǵyz ujymnyń ishinen Bolat Sarybaev atyndaǵy arnaıy syılyq pen gran-prı, sondaı-aq júldeli úsh orynnyń ıegerlerin anyqtaıtyn bolady.
«Birinshi «Shabyt» festıvalinen bastap túrli nomınatsııalar boıynsha qazylar alqasynyń múshesi bolyp júrmin. Osy jyldar ishinde festıval aýqymy aıtarlyqtaı keńeıe tústi. Búgin 9 ansambldiń ónerin tamashaladyq. Barlyǵy bir-birinen asyp túsedi. Bir ujymda otyzǵa jýyq mýzykant bar, bul - qajyrly eńbekti ári tártipti qajet etetin jumys dep oılaımyn. Olar halyq dástúrin, folklordy jandandyra otyryp, mýzykany jetkizýdiń jańa tásilderin, úlgilerin izdep jatyr», - dedi atalmysh nomınatsııa boıynsha qazylar alqasynyń tóraǵasy, Qyrǵyzstannyń halyq ártisi, Qyrǵyz ulttyq konservatorııasynyń rektory Muratbek Begalıev.
Shyǵys Qazaqstannan kelgen «Altaı» folklorlyq ansambli mereıtoılyq festıvaldiń erekshe atmosferasyn atap ótti.
«Bizdiń ujym 17 jyldan beri óner kórsetip keledi. Festıvalge ekinshi ret qatysyp otyrmyz, biraq bul joly jeńispen qaıtamyz degen oıdamyn», - deıdi ansambldiń múshesi Kámshat Santyrova.
Aıta keteıik, «Shabyt» XX halyqaralyq jastar festıvali 2017 jyldyń 3-7 qarashasy aralyǵynda Astanada ótip jatyr. Jas talanttar alty nomınatsııa boıynsha baq synaýda.
