Qyrǵyzstannyń eks-prezıdentiniń kishi ulyn 25 jylǵa bas bostandyǵynan aıyrý týraly úkim shyǵaryldy
BІShKEK. 28 naýryz. QazAqparat - Qyrǵyzstannyń buryńǵy prezıdenti Qurmanbek Bakıevtiń uly jáne Qyrǵyz Respýblıkasynyń Damý, ınvestıtsııa jáne ınnovatsııalar jónindegi ortalyq agenttiginiń (DIIOA) eks-dırektory Maksım Bakıevke qatysty múlkin tárkilep, 25 jylǵa bas bostandyǵynan aıyrý týraly syrttaı úkim shyǵaryldy, dep habarlady sársenbi kúni respýblıkanyń Bas prokýratýrasy.
Bishkek qalasynyń Pervomaısk aýdandyq soty buryńǵy memleket basshysynyń kishi uly - 36 jastaǵy Maksım Bakıevti: Qyrǵyzstan Respýblıkasy Qylmystyq kodeksiniń 30 («Qylmysqa qatysý»), 303 («Jemqorlyq») jáne 306 («Qyrǵyzstan Respýblıkasynyń múddesine qaıshy keletin kelisim-shart jasaý, memlekettik satyp alýdy iske asyrý») baptary boıynsha kináli dep tapty.
«Maksım Bakıevke 25 jyl bas bostandyǵynan aıyrý týraly úkim shyǵaryldy, sondaı-aq ol belgili bir qyzmetterde úsh jylǵa sheıin jumys jasaý quqyǵynan aıryldy, múlki tárkilenedi. Jazasyn kúsheıtilgen rejımdegi túzetý kolonııasynda óteıtin bolady», - dep habarlaıdy Qyrǵyzstan bas qadaǵalaý organynyń baspasóz qyzmetinen.
Atap ótilgendeı, memlekettik aıyptaýshy M.Bakıevti dál osy jaza merzimine sottaý týraly suraǵan bolatyn. «Sottyń osy úkimin eskere otyryp, Qyrǵyzstan Respýblıkasynyń Bas prokýratýrasy ony elge ekstradıtsııalaý jumystaryn jalǵastyrady», - dep málimdedi baspasóz qyzmetinde.
2010 jyldyń sáýir aıyndaǵy oqıǵalardan keıin Londonda (Ulybrıtanııa) jasyrynyp júrgen Maksım Bakıevti 2012 jyldyń qazan aıynda jergilikti polıtsııa ustaǵan. Keıin burynǵy Qyrǵyz prezıdentiniń uly sot sheshimi boıynsha 250 fýnt sterlıng kepil berip, bosatyldy. Ony ekstradıtsııalaý jónindegi sot 2013 jyldyń 13 mamyrynda AQSh-ta bolady.
Qyrǵyzstanda DIIOA burynǵy basshysy «Chakan GES» úlestes kompanııasynyń «Severelektro» AAQ-n satý boıynsha kórineý paıdasyz kelisimge qatysty jáne onyń nátıjesinde memleketke 132,7 mln. AQSh dollary kóleminde zııan keltirdi dep aıyptaldy. Oǵan sonymen birge jalpy aýdany 9,32 gektar bolatyn Ystyq kól jaǵasyndaǵy «Vıtıaz» pansıonaty aýmaǵynda ornalasqan jáne tabıǵı aýmaqqa jatatyn jer telimin jekeshelendirý boıynsha kórineý zańsyz kelisim jasady degen aıyp taǵylyp otyr. Memleketke keltirilgen shyǵyn 123,4 mln. somǵa baǵalandy (shamamen 398 mln teńge).
