Qyrǵyzstannyń eks-prezıdentin ustaý operatsııasy: 45 adam zardap shekti
BІShKEK. KABAR - QazAqparat – Túngi saǵat 03:00-degi jaǵdaı boıynsha, Bishkek qalasy men Shý oblystyq birikken aýrýhanalaryna túrli jaraqatpen 45 adam tústi, dep habarlaıdy QazAqparat Kabar agenttigine silteme jasap.
Eldiń Densaýlyq saqtaý mınıstrliginen málim etkendeı, zardap shekkenderdiń arasynda Shý oblystyq Іshki ister bas basqarmasynyń basshysy Samat Qurmanqulov bar. Oǵan «bassúıek-mıynyń jabyq jaraqaty, mıdyń shaıqalýy, sondaı-aq aýyr dárejedegi mıdyń qatty soǵylýy» dıagnozdary qoıylyp otyr. Ota jasaldy (bas súıekti trepanatsııalaý). Dárigerler onyń operatsııadan keıingi halin «asa aýyr» dep baǵalaýda. Qazirgi tańda jansaqtaý bóliminde jatyr.
Ózge zardap shekkenderdiń arasynda 22 adamǵa «jabyq bassúıek-mıynyń jaraqaty, bas mıynyń shaıqalýy» dıagnozdary qoıylǵan, 13 adamǵa rezeńke oq tıgen, 2-ýiniń denesiniń ár jerine zaqym tıgen, 4 adamǵa oq tıgen, taǵy 4-eýi denesine soqqy alǵan.
Olardyń ishinen 1 zardap shegýshi ambýlatorlyq emdelýge jiberildi, jaraqat alǵan arnaıy jasaqtyń 1 sarbazy keýde qýysyna tıgen oqtan ota kezinde kóz jumdy. Qazirgi tańda 43 adam statsıonarlyq em qabyldaýda.
Qyrǵyz Respýblıkasy ІІM baspasóz qyzmetinen málim etkendeı, mılıtsııa halyqpen soqtyǵysyp qalmaý úshin Qoı-Tash aýylynan ketip qalǵan. Dál qazir mılıtsııa shtattyq rejimde jumys jasap, qoǵamdyq tártiptiń saqtalýyn jáne azamattardyń qaýipsizdigin qamtamasyz etip otyr.
Málim etilgendeı, quqyqqorǵaý organdary tarapynan azamattarǵa qatysty atys qarýy qoldanylǵan joq. Qarý A.Atambaevtyń úıi tarapynan atylǵan.
Qyrǵyz Respýblıkasy Jogorký Keneshiniń baspasóz hatshysy Ibraım Nurakýnulynyń málimetinshe, Qyrǵyzstan Parlamenti kezekten tys otyrys ótkizedi. Ol eldiń burynǵy prezıdenti Almazbek Atambaevty ustaý boıynsha arnaıy operatsııaǵa baılanysty Jogorký Keneshtiń kezekten tys otyrysyn ótkizý jóninde parlament spıkeri Dastanbek Jumabekovpen sóıleskenin atap ótti.
Eske salaıyq, keshe A.Atambaevtyń Qoı-Tash aýylyndaǵy úıde atys bolyp, Shý oblystyq ІІBB-niń jedel tergeý toby mılıtsııaǵa túsken qońyraý boıynsha oqıǵa ornyna attandy.
Aıta ketsek, buǵan deıin Jogorký Kenesh eldiń eks-prezıdentinen qol suqpaýshylyq mártebesin alyp tastaý týraly sheshim qabyldaǵan bolatyn. Atambaevqa qatysty depýtattar tarapynan taǵylǵan aıyptardy zertteý boıynsha arnaıy depýtattyq komıssııa quryldy. Komıssııa jumysynyń nátıjesinde oǵan 6 epızod boıynsha aıyp taǵý sheshimi qabyldandy. Alaıda Bas prokýratýra komıssııanyń jumysyn zań turǵysynan baǵalaı kele, tek bes epızodty qaldyrdy.
Arnaıy operatsııa barysynda oqıǵa ornyna Shý oblysynan jedel járdemniń - 5, Bishkektiń 3 brıgadasy attandy.
