Qyrǵyzstannyń eks-depýtatynyń isi: Almaty sotynda kontrabandadan kelgen shyǵyn jarııalandy
ALMATY. QazAqparat - Almaty qalalyq qylmystyq ister jónindegi mamandandyrylǵan aýdanaralyq sotynda arnaıy operatsııa barysynda ustalǵan Qyrǵyzstan Jogorký Keneshiniń burynǵy depýtaty Damırbek Asylbekulynyń isi boıynsha basty sot talqylaýy ótip jatyr, dep habarlaıdy «QazAqparat» HAA tilshisi.
Sotqa deıingi tergep-tekserý organy transulttyq uıymdasqan top 2017 jylǵy 1 jeltoqsannan 2018 jylǵy 15 aqpanǵa deıin iri jáne asa iri kólemdegi halyq tutynatyn taýarlardy (jalpy quny 407 558 653 teńge) kontrabandalyq jolmen QHR-dan Qyrǵyzstan arqyly Qazaqstan Respýblıkasyna birneshe márte jetkizgen. Saldarynan EAEO bıýdjetine 99 015 094,2 teńge somasynda kedendik baj salyqtary men mindetti tólemder túspeı qalǵan. Munymen EAEO-ǵa qatysýshy elderge asa iri somada ekonomıkalyq zalal keltirdi.
Іs materıaldaryna qaraǵanda, qylmystyq topqa basshylyq jasaǵan Damırbek Asylbekuly onyń músheleriniń árbirine naqty tapsyrmalar berip otyrǵan.
Sondaı-aq búgingi sot protsesinde belgili bolǵandaı, qylmystyq top kontrabandalyq taýardy Almaty qalasy boıynsha kedergisiz ótkizý úshin úlken kólemde para berip kelgen.
Qylmystyq is 126 tomnan turady. Іs boıynsha Damırbek Asylbekulymen birge taǵy 11 adam sottalyp jatyr, 70 adam kýáger retinde kórsetilgen.
Aıta keteıik, sot protsesine Qyrǵyzstan Parlamentiniń músheleri tyńdaýshy retinde qatysty.
Eske salaıyq, aǵymdaǵy jyldyń aqpan aıynda QR Bas prokýratýrasy, QR Ulttyq qaýipsizdik komıteti jáne Sybaılas jemqorlyqqa qarsy is-qımyl ulttyq bıýrosy Almaty, Jambyl, Ońtústik Qazaqstan oblystary men Almaty qalasynda arnaıy operatsııa júrgizip, 30-ǵa jýyq adam ustaldy. Olardyń arasynda keden organynyń, shekara qyzmetiniń laýazymdy tulǵalary, brokerler, deldaldar, sondaı-aq uıymdasqan qylmystyq top músheleri bar. Arasyndaǵy úsheýi Qyrǵyzstan azamaty. Onyń biri - Qyrǵyzstan Jogorký Keneshiniń depýtaty Damırbek Asylbekuly.
Keıin anyqtalǵandaı, Damırbek Asylbekulynyń Qazaqstan azamattyǵy bar. Bul rette, sottalýshynyń ózi Qyrǵyzstan azamaty ekenin atap ótýde.
Almaty soty tergeý kezinde Damırbek Asylbekulyn qamaýda ustaý merzimin birneshe ret uzartqan bolatyn.
