Qyrǵyzstannyń burynǵy vıtse-premerine Interpol arqyly izdeý salynbaq
BІShKEK. QazAqparat - Qazirgi ýaqytta Qyrǵyzstannyń burynǵy vıtse-premeri Asqarbek Shádıevke 304-shi bapqa sáıkes jaýapty laýazymǵa ıe tulǵanyń qyzmetin asyra paıdalaný jáne asa iri kólemde shyǵyn keltirý boıynsha syrttaı aıyp taǵyldy. Bul jóninde Kabar agenttiginiń baspasóz máslıhatynda Qaýipsizdik keńesiniń hatshysy Damır Saǵynbaev málim etken.
Onyń aıtýynsha, eks-vıtse-premer-mınıstrge izdeý jarııalandy.
«Budan bólek, Shádıevke memleket shekarasyn zańsyz kesip ótý, sondaı-aq asa iri kólemde qylmystyq áreketten túsken qarajatty zańdastyrýǵa qatysty birqatar qylmystyq ister qozǵaldy», - dedi Saǵynbaev.
Sondaı-aq, ol Shádıev elden tys jerlerde júrgendikten, Qyrǵyz Respýblıkasynyń arnaıy qyzmetteri burynǵy sheneýnikti ustaý úshin Interpolmen jumys jasap jatqanyn aıtty.
