Qyrǵyzstannyń burynǵy prezıdentiniń kúıeý balasynyń qylmystyq isi janyp ketken
BІShKEK. QazAqparat - Qyrǵyzstannyń burynǵy prezıdenti Asqar Aqaevtyń kúıeý balasy Ádil Toıǵanbaev Reseıde 2 ret ustalǵannan keıin Qyrǵyz Respbýlıkasynyń prokýratýrasy men bıznesmenniń qorǵaýshylarynyń jumysy qyza tústi.
Qorǵaýshy Ikramıdın Aıtqulov habarlaǵandaı, Qyrǵyz Respýblıkasynyń bas prokýratýrasyndaǵy Ádil Toıǵanbaevqa qatysty qylmystyq is 2010 jyldyń sáýirinde ǵımarattan shyqqan órt saldarynan tolyǵymen janyp ketken.
Osyǵan oraı, qorǵaýshynyń sózine qaraǵanda, 3 naýryzda ótken sot otyrysynda prokýratýra qylmystyq is materıaldaryn qaıta jınaý týraly hattardy ǵana usyna aldy. Qajetti qujattar bolmaǵandyqtan, qorǵaýshylar Á. Toıǵanbaevty qylmystyq qýdalaý men ony halyqaralyq izdeýge jarııalaý isin zańsyz dep esepteıdi.
Qyrǵyzstannyń eks-prezıdenti Asqar Aqaevtyń qyzy Bermettiń jubaıy 48 jastaǵy Ádil Toıǵanbaev QR Qylmystyq kodeksiniń 3 baby boıynsha aıyptalýda: «Aldyn ala kelisim boıynsha bir top adam birigip jasaǵan alaıaqtyq», «Urlaý» jáne «Sýbektilerge basshylyq etetin laýazymdy tulǵalardyń salyq tóleý men mindetti saqtandyrý tólemderdi tóleýden jaltarý».
Buryn ol Qyrǵyzstanda janar-jaǵarmaıdy satý jáne basqa da bıznespen aınalysqan. Alaıda 2005 jyly bolǵan oqıǵadan keıin elden ketti.
