Qyrǵyzstannyń burynǵy prezıdenti men onyń týystaryna «tapsyryspen kisi óltirgen» degen aıyp boıynsha qylmystyq is qozǵaldy
BІShKEK. QazAqparat - Qyrǵyzstannyń burynǵy prezıdenti Qurmanbek Bákıev pen onyń jaqyn týystary taǵy da qylmystyq iske qatysty degen kúdikke alyndy. Osy joly Qurmanbek Bákıev pen onyń aǵasy Jánibek, sonymen birge uldary Marat pen Maksım sheteldik bıznesmen Shon Deılıge qastandyq jasalýyna qatysy bar degen kúdikke alynyp otyr.
Qyrǵyzstannyń joǵarǵy sotynyń baspasóz qyzmetinen habarlaǵandaı, 2005 jyldyń aıaǵynda Maksım Bákıev óziniń ákesi Qurmanbek Bákıevpen Djeırýı altyn óndiretin ken ornyn zańsyz ken óndirý jáne ony úshinshi bir tulǵalarǵa qaıta satý maqsatymen sóz baılasyp, kelisim jasaǵan.
Osy kezde ken óndirýge qatysty lıtsenzııa Oxus Gold Pls. kompanııasyna tıesili bolatyn, al onyń ókili Shon Deılı Qyrǵyzstanda jańa ınvestıtsııalyq usynystar engizý jóninde túsinikteme berýge baılanysty jumystar júrgizip júrgen. Ken ornynda 50 paıyz úles Qyrǵyzstanǵa tıesili edi.
Qylmystyq istiń materıaldarynda Maksım Bákıev Djeırýı ken ornyn zańsyz basqarýǵa Sh.Deılı jol bermeýi múmkin dep kúdiktenip, oǵan qastandyq jasady dep keltirilgen.
Shon Deılıdi óltirý tergeýde anyqtalmaǵan belgisiz adamǵa tapsyrylǵan. Qylmysker 2006 jyldyń 7 shildesinde túngi ýaqytta Shon Deılıge qarýdan birneshe oq jaýdyrǵan bolatyn. Der kezinde kórsetilgen medıtsınalyq kómektiń arqasynda Shon Deılı aman qaldy.
Qylmystyq is boıynsha sottyń isti qaraýy 2014 jyldyń 27 aqpanyna belgilengen. Eske sala keteıik, barlyq atalǵan sheneýnikter Qyrǵyzstanda basqa qylmystyq ister boıynsha uzaq merzimderge syrttaı aıyptalǵan. Al Jánibek Bákıev ómir boıyna bas bostandyǵynan aıyrylǵan.
