Qyrǵyzstannyń burynǵy Prezıdenti Asqar Aqaevtyń qazaqqa jer bergeni ras pa? - respýblıkalyq basylymdarǵa sholý

***


«Eýropadaǵy qaýipsizdik jáne yntymaqtastyq uıymynyń sammıti qazaq eli úshin tarıhı oqıǵa dep sanaımyn. Elýden astam memleket basshylary osyndaı quramda Keńes Odaǵynda da jınalǵan emes. Mundaı oqıǵa TMD keńistiginde de, Ortalyq Azııada da bolǵan joq. Birinshiden bul - biz úshin jańa múmkindik jáne jańa jaýapkershilik. Árıne, sammıttiń Astanada ótkizilýi - Prezıdent Nursultan Nazarbaevtyń, Syrtqy ister mınıstrliginiń, osy baǵytta jumys jasap jatqan azamattardyń jáne búkil qazaqstandyqtardyń jeńisi. Bul úlken sheshim úlken saıasatkerlik pen mámilegerlikti qajet etkeni sózsiz», deıdi «Aq jol» partııasynyń tóraǵasy Álıhan Báımenov. Sammıtke qatysty ǵalymdar men sheteldik saıasatkerlerdiń pikirleri «Aıqyn aptanyń» búgingi sanyndaǵy «Astana sammıti - qazaq eli úshin tarıhı oqıǵa» atty maqalada.

Sondaı-aq atalmysh basylymynyń jazýynsha, Qyrǵyzstannyń burynǵy prezıdenti Asqar Aqaevty osy eldiń qazirgi Ýaqytsha úkimeti basshysynyń orynbasary Ázimbek Beknazarov «elge qarsy aýyr qylmys jasady» dep aıyptap otyr. Qazirgi bılik ókilderiniń aıtýynsha, Asqar Aqaev «Qazaqstan men Qytaıǵa qyrǵyzdyń tarıhı jerlerin bergen» kórinedi. Osyǵan oraı ótpeli kezeń prezıdenti

Roza Otynbaeva Asqar Aqaevty tuńǵysh Prezıdent retindegi ımmýnıtetinen aıyryp, Máskeýden ekstradıtsııalaý týraly dekretke qol qoıdy. Atalmysh másele jóninde «Aıqyn apta» basylymynyń búgingi sanyndaǵy «Asqar Aqaev qazaqqa jer berip pe edi?» atty maqalada.

***

«Alash aınasy» basylymynyń habarlaýynsha, Aral teńiziniń aımaǵynda salynǵan «Kókaral» bógetinde ketken kemshilikter qazir ashyq áńgimege aınalyp otyr. Oǵan qyrýar qarjy jumsalady. Qanshama kúsh-qaıratty sarp etken bóget te ornatyldy. Alaıda onyń kem-ketik tustary kópshilikti eleńdetip otyrǵan jaıy bar. Óıtkeni atalmysh sý nysanynyń mol sýdy óz deńgeıinde ustap turýǵa shamasy keler emes. Ony alyp jobany iske asyrý barysynda ketken aǵattyq dep sanaýǵa negiz bar. Atalmy másele jóninde «Alash aınasy» basylymynyń búgingi sanyndaǵy «Asyǵys jasalǵan alyp jobadan aqaý shyqty» atty maqalada.

Sondaı-aq osy basylymnyń jazýynsha, Keńes Odaǵymen birge kelmeske ketken dúnıeniń biri mektepke kıetin balalardyń biryńǵaı kıim úlgileri edi. Táýelsizdikten bergi naryqtyq qatynastar álgindeı bir kezdegi temir tártipti joq qylyp, biryńǵaı formanyń ornyn «ala-qulalyq» basqan-dy. Al ondaı ala-qulalyqtyń astary áleýmettik teńsizdik kórsetkishine aınala jazdap, bilim ordasy úlde men búldege oranǵandar men turmysy tómender bolyp jarylýdyń aldynda qalǵan. Degenmen sońǵy ýaqytta bul jaǵdaı jurtshylyqtyń -jan-jaqty talqylaýyna ulasyp, resmı organdar men jergilikti bılik

te máseleniń mánisine tereń úńile bastaǵanǵa uqsaıdy. Mektep oqýshylarynyń kıim úlgisine baılanysty ótken respýblıkalyq semınar-keńeste kóterilgen máseleler jóninde «Alash aınasy» basylymynyń búgingi sanyndaǵy «Oqytýshyǵa qarap, oqýshy da boı túzemek» atty maqalada.

***

«Nur Astana» basylymynyń jazýynsha, búginde dúnıejúzi boıynsha týrızmnen túsetin tabys munaıdan keıingi ekinshi orynda. Qazaqstannyń tamasha tabıǵaty, tanymdy tarıhy týrıstik nysandardy utymdy paıdalanýǵa múmkindik bereri sózsiz. Ásirese qazaqtyń saıyn saharasy - Baıanaýyl, Býrabaı, Alakól, Altaı men Alataýdyń bókteri, Kóksheniń seksen kóli. Eki dúnıe esigi - Túrkistan, Uly jibek jolynyń boıy - qazaq jeriniń bolashaǵyna úlken kapıtal ákeletin oryndar. Alaıda Qazaqstannyń týrızm salasy mol tabysqa kenele qoıǵan joq. Bul másele týraly «Nur Astana» basylymyndaǵy «Týrızm brendi qashan qalyptasady?» atty maqalada.

***

«Qazaq tiliniń janaıqaıy jańa baǵdarlamany jasaýshylarǵa jetken sııaqty. Onyń basty artyqshylyǵy - qazaq tiliniń taǵdyryna janashyrlyqpen qaraǵanda, Qaıtsek burynǵy qalpyna ozdyramyz degen talpynys bar. Baǵdarlamadaǵy talap ta, nıet te, tilek te óte jaqsy. Biraq qorqatynym - nıet jaqsy áreket bolbyr, jigersiz bolsa, istiń ońǵa baspaǵany. Búgingi til komıtetiniń óz qolyndaǵy bılikti tolyq paıdalanyp, iske belsene kirisse de, talaı isti tyndyrary sózsiz» deıdi jazýshy, Qazaqstan Respýblıkasynyń eńbek sińirgen qaıratkeri Sultan Orazaly «Astana aqshamy» basylymyna bergen suhbatynda. Atalmysh basylymdaǵy «Baǵdarlama iske assyn desek, quziretti mekeme jumys isteýi kerek» atty suhbattan jazýshynyń úkimet daıyndaǵan tilderdi qoldaný men damytý baǵdarlamasynyń jobasyna qatysty pikirlerin bile alasyzdar.

***

«Kazahstanskaıa pravda» basylymynyń habarlaýynsha, Qazaqstan halqynyń basym bóligi qonystanǵan Almatyda turǵyn-úı kommýnaldyq sharýashylyq nysandaryn jóndeý men rekonstrýktsııalaý jumystary boıynsha 31 mıllıard teńgeniń 600-ge jýyq ınvestıtsııalyq jobalary iske asyrylǵan. Osyǵan qaraı jańa jumys oryndary ashylyp, oqý oryndaryn aıaqtaýshylar úshin tájirıbe alýǵa mol múmkindik jasaldy. Sondaı-aq jalǵyzbasty jáne kópbalalay analar men múmkindigi shekteýli jandarǵa, sonymen qatar ózge de áleýemttik jaǵynan az qamtylǵan azamattarǵa arnalǵan áleýmettik jumys oryndary ashyldy. Almatyda «Jol kartasy» baǵdarlamasynyń aıasynda atqarylyp jatqan ister jóninde «Kazahstanskaıa paravda» basylymynyń osy sanyndaǵy «Bolshe raboty horosheı ı raznoı» atty maqalada.