Qyrǵyzstannyń burynǵy premer-mınıstri 18 jylǵa sottaldy
BІShKEK. KABAR – QazAqparat – Bishkektiń Pervomaıskıı aýdandyq sotynda Bishkektegi Tarıhı mýzeı men Sholpan-Ata qalasyndaǵy ıppodromdy qaıta qurýǵa qatysty kezekti sot otyrysy ótti. Bul týraly QazAqparat Kabarǵa silteme jasap habarlaıdy.
Sot burynǵy premer-mınıstr Sapar Isaqovty Qyrǵyz Respýblıkasy QK-niń 319-babynyń 2-bóligi boıynsha aıypty dep tanyp, ony 18 jylǵa bas bostandyǵynan aıyrdy. Sondaı-aq ol sot sheshimimen 247 mln 650 myń som kólemindegi shyǵyndy óteıdi.
Qylmystyq istiń ekinshi múshesi Prezıdent apparatynyń azamattyq damý, dinı jáne etnıkalyq saıasat bóliminiń burynǵy meńgerýshisi Mıra Karybaeva QR QK 320-baby 1-bóligi boıynsha aıypty dep tanylyp, oǵan 260 myń som kóleminde aıyppul salyndy.
Buǵan deıin Sverdlovskıı aýdandyq soty burynǵy premer-mınıstr, sol kezde QR Prezıdenti apparatynyń syrtqy saıasat bóliminiń meńgerýshisi bolǵan Sapar Isakovty 15 jylǵa bas bostandyǵynan aıyrǵan bolatyn. Ol jazasyn qatań rejımdegi túrmede óteıdi. Sonymen qatar ol dıplomatııalyq dárejesinen jáne barlyq memlekettik marapattarynan aıyryldy.
Eske salsaq, Qyrǵyzstannyń burynǵy premer-mınıstri 2018 jyly maýsym aıynda qamaýǵa alynǵan bolatyn.