Qyrǵyzstannyń burynǵy bas prokýrory 12 jyldan soń túrmege qamalady
ASTANA. QazAqparat - Qyrǵyz Respýblıkasynyń burynǵy ádilet mınıstri, bas prokýrory, qazirgi Jogorký Kenesh depýtaty Aıda Salıanovaǵa sot úkimi shyqty, dep habarlaıdy QazAqparat tilshisi.
Bishkektiń Lenın aýdandyq sotynyń sheshimimen ol bes jylǵa bas bostandyǵynan aıyrý jáne múlkin tárkileý jazasyna kesildi.
«Salıanovanyń 2015 jyly týǵan qyzy bolýyna baılanysty, ol jazasyn 12 jyldan keıin, qyzy 14 jasqa tolǵan soń óteıtin bolady», - dep málimdedi memlekettik aıyptaýshy Nurlan Taǵaev.
Eske sala keteıik, Qyrǵyz Respýblıkasy QK 304-babynyń (qyzmet babyn asyra paıdalaný) 4-bóligine sáıkes 2016 jyldyń 26 jeltoqsanynda Aıda Salıanovaǵa qatysty qylmystyq is qozǵalǵan bolatyn. Oǵan 2010 jylǵy oqıǵalardan keıin izdeýde júrgen Maksım Bakıevtiń serigi Alekseı Elıseevke advokattyq lıtsenzııasyn qalpyna keltirýge kómektesti degen aıyp taǵylǵan.
Aıta keterligi, Salıanovanyń ózi bul sot protsesiniń saıası astary bar ekenin birneshe ret aıtqan bolatyn. Al onyń jaqtastary úkim oqylǵannan keıin sýdıaǵa narazylyqtaryn bildirdi.
