Qyrǵyzstannyń birqatar óńirinde koronavırýsqa baılanysty tótenshe jaǵdaı engizildi
BІShKEK. QazAqparat – Kabar – Qyrǵyzstan prezıdenti Sooronbaı Jeenbekov búgin, 24 naýryzda Jogorký Kenesh tóraǵasy Dastanbek Djýmabekovpen, eldiń premer-mınıstri Mýhammedkaly Abylgazıevpen jáne Joǵarǵy sot tóraǵasy Gýlbara Kalıevamen kezdesti, dep habarlaıdy QazAqparat Kabar agenttigine silteme jasap.
Memleket basshysy álemdegi qıyn jaǵdaıdy, sondaı-aq elde koronavırýs ınfektsııasy qarqyny artyp kele jatqanyn atap ótti.
Osyǵan baılanysty prezıdent Bishkek, Osh jáne Jalal-Abad, Osh oblysynyń Kara-Sýı, Nookat aýdandarynda, Djalal-Abad oblysynyń Sozaq aýdanynda tótenshe jaǵdaı engizý týraly sheshim qabyldaǵanyn aıtty.
Prezıdent tıisti Jarlyqqa qol qoıylyp, Jogarký Keneshke jiberilgenin málim etti.
Tótenshe jaǵdaı 25 naýryz saǵat 08.00-den bastap 2020 jyldyń 15 sáýiri saǵat 08.00-ge deıin engiziledi. Atalǵan qalalar men aýdandardyń aýmaǵynda komendatýra quryldy.
Jeenbekov osy aýdandardaǵy sanıtarlyq-karantındik beketterden ótý kezinde azyq-túlik jáne basqa da taýar tasıtyn júk kólikterine basa nazar aýdarýdy tapsyrdy.
