Qyrǵyzstannyń birinshi Vıtse-premeri burynǵy prezıdent Q.Bákıevtiń ulymen baılanys ornatqanyn joqqa shyǵardy
BІShKEK. 25 mamyr. QazAqparat /Arnur Rahymbekov/ - Seısenbi kúni tanymal ınternet-resýrstardyń birinde Qyrǵyzstannyń birinshi Vıtse-premeri Ómirbek Babanov pen eldiń burynǵy prezıdentiniń uly Maksım Bákıevtiń sóıleskeni týraly jazba jaryq kórdi.
Osyǵan baılanysty Ómirbek Babanov jergilikti BAQ-ta málimdeme jasady. Onyń ózi aıtyp ótkendeı, «bul jazba meni jáne úkimetti senimsizdendiretin jalǵan jazba».
«Maksım Bákıevpen sóılespegenimdi, onymen qosa eshkimnen aqsha suramaǵanymdy aıtqym keledi. Bul Ómirbek Ábdrazmanovtyń jumys tobynyń nátıjesin halyqqa jarııa eterdiń aldyndaǵy arzan saıasatkerlerdiń oıyny. Men bul jalǵan ári arandatýshylyq ekenin taǵy bir márte qaıtalaǵym keledi. Men tıisti quqyq qorǵaý organdaryna bul jazbany zertteý týraly ótinish bildirdim. Jalǵan jazba jasaýǵa deıin baratyn saıasatkerlerdi túsinbeımin», - delingen birinshi vıtse-premerdiń málimdemesinde.
