Qyrǵyzstannyń birde-bir kedendik ótkizý beketi Keden odaǵynyń talaptaryna saı kelmeıdi - Qyrǵyzstannyń Keden qyzmetiniń tóraǵasy
KEK. 2 shilde. QazAqparat /Erlik Erjanuly/ - Qazaqstannyń búkil ońtústik shekarasy endi Keden Odaǵynyń shekarasyna aınaldy. Bul týraly keshe Bishkek qalasynda Qyrǵyzstan men Qazaqstan arasyndaǵy yntymaqtastyq qarym-qatynasqa arnalǵan baspasóz máslıhatynda aıtyldy.
"Qyrǵyzstan men Keden odaǵynyń arasyndaǵy másele ádistemelik turǵydan góri tehnologııalyq sıpatqa ıe. Bul - eń aldymen ınfraqurylym. Qazirgi tańda Qyrǵyzstannyń birde-bir kedendik ótkizý beketi Keden odaǵynyń jolaýshylar men júk tasqyny talaptaryna saı kelmeıdi", - deıdi Qyrǵyz Respýblıkasy Keden qyzmetiniń tóraǵasy Kýbanychbek Qulshatov. Onyń aıtýynsha, Qyrǵyzstannyń Qazaqstanmen shekarasyndaǵy birden-bir kedendik ótkizý beketi sanalatyn Qordaı beketiniń táýliktik ótkizý múmkindigi 5 myń adam. Al qazir onda júkteme 38 myń adamdy qurap otyr. Bul júk Qyrǵyzstan men Qazaqstannyń shekarashylary men kedenshileriniń ıyǵynda tur.
"Qazir Keden odaǵynyń talaby boıynsha bizde 10 ótkizý beketiniń beseýi ǵana jumys istep tur. 29 maýsym kúni Qyrǵyz Respýblıkasy tarapynan táýlik boıy jumys isteıtin "Ken-Býlýn" ótkizý beketi ashyldy. Onda Ystyqkólge avtobýstardy jiberýge barlyq jaǵdaı bar. Jaqyn arada qosymsha Qarasý-Aqtelek ótkizý beketin ashýdy qaraımyz. Kelissózder júrip jatyr", - deıdi Kýbanychbek Qulshatov. Onyń sózine qaraǵanda, qazirgi tańda Qazaqstan aýmaǵyndaǵy Qarasýda qurylys jumystary júrip jatyr. Onda jańa ótkizý beketi salynýda. Sol sebepti qyrǵyz kedenshileri qazaqstandyq áriptesterin óz aýmaǵynda jumys isteýge shaqyrýda. Birlesken baqylaý týraly kelisim bar. 7 shilde kúni Qazaqstan-Qyrǵyzstan arasynda "Aısha bıbi-Shoń Qarqa" ótkizý beketi ashylmaq. Osyǵan qaramastan Qyrǵyz Respýblıkasynyń ótkizý beketterindegi jolaýshylar men júk aǵynyndaǵy júkteme báribir saqtalyp qalady.
