Qyrǵyzstannyń arnaıy qyzmeti Sırııada qaza tapqan 5 qyrǵyz jaldamalysy týraly habarlady
BІShKEK. QazAqparat - Qyrǵyz Respýblıkasynyń MUQK organdary Sırııada áskerı qaqtyǵysta óz eliniń bes azamaty ajal qushqanyn habarlady.
Olardyń bári túrli joldarmen Sırııaǵa soǵysqa attanǵan ońtústik óńirdiń týmalary bolyp tabylady. Qyrǵyz Respýblıkasy arnaıy qyzmetiniń habarlaýynsha, bul elde zańsyz áskerı quramalarda 50-ge jýyq qyrǵyzstandyq bar.
2013 jyly mamyrda týysqandary jáne basqa da múmkindikter arqyly arnaıy qyzmet B. Asad úkimetiniń áskerine qarsy soǵysqa qatysý úshin attanǵan eki qyrǵyzstandyqty elge qaıtaryp alǵan.
2014 jylǵy qańtarda qyrǵyz eliniń arnaıy qyzmeti Bishkek pen Shý oblysynan halyqaralyq terrorlyq uıymnyń eki sodyryn ustaǵan. Olar Sırııa aýmaǵynda jaýyngerlik daıyndyqtan ótip, Qyrǵyzstanǵa kelgen.
Qylmyskerler jasandy qujatty paıdalanyp, Sırııadaǵy qaqtyǵys aımaǵyna jaldamaly adamdar jınap alyp ketýdi josparlaǵan. Jedel-izdestirý sharalary barysynda Kalashnıkov avtomaty, tapanshalar, qarýlar men oq-dáriler tabylǵan.
