Qyrǵyzstannyń arnaıy qyzmeti Bishkekte josparlanǵan birneshe lańkestik áreketterdiń aldyn aldy
BІShKEK. 29 jeltoqsan. QazAqparat /Arnur Rahymbekov/ - Búgin Bishkekte Qyrǵyzstan ulttyq qaýipsizdik memlekettik komıtetiniń tóraǵasy Keneshbek Dúıshebaevtyń baspasóz máslıhaty bolyp ótti.
Arnaıy qyzmettiń jetekshisi Qyrǵyzstanda «Islam Jıhad odaǵy» halyqaralyq lańkestik uıymynyń músheleri qolǵa túskenin habarlady. «Qazirgi tańda 9 kúdikti adam quryqtaldy. Olar qarasha aıyndaǵy Sport saraıy aldyndaǵy lańkestik áreketti daıyndaý men 25 jeltoqsan kúni Bishkek qalasy ishki ister departamentiniń aldynda jarylýy kerek avtokólikti mınalaýǵa tikeleı qatysqan. Bes adamǵa halyqaralyq izdeý jarııalandy», - dedi Keneshbek Dúıshebaev.
«Qolǵa túsken lańkester 25 jeltoqsan kúni saǵat 9-da ishki ister departamentiniń aldynda avtokólikti jaramyz dep josparlaǵan. Sol kezde departament janynda quqyq qorǵaý organdarynyń basym bóligi jınalatyn bolǵan. Avtokóligin urlatqan azamat oǵan shabýyl jasaǵandardy tanyǵan. Olar - biz qolǵa túsirgen adamdar. Qazirgi tańda biz olardyń aty-jónderin jarııa ete almaımyz, tek olardyń barlyǵy Qyrǵyzstan azamattary ekenin, ulttary qyrǵyz ekenin aıta alamyn. Olar Qazaqstan men Reseıdegi lańkestik toptarmen baılanysy bar. Qarýsyzdandyrylǵan top halyqaralyq jeliniń tek az ǵana bóligi», - dep qorytyndylady Keneshbek Dúıshebaev.
